“Nasaf”ga kelgan legionerning nomi ulug‘, suprasi quruqmi?

O‘zbek futbolida transferlar mavsumi ancha qizg‘in kechmoqda. Yozning jazirama issig‘i ham jamoalarni oldi-berdilardan to‘xtata olmayapti. Klublar ikkinchi davraga tarkibni kuchaytirmoqda. Xorijdan futbolchilar olib kelayotganlar ham bor.

Bir necha kun avval "Nasaf" klubi safiga braziliyalik Mateus Lima Kruz kelib qo‘shildi. Hujumchi qarshiliklar safida ko‘rikdan o‘tib, jamoa bilan 1 yillik shartnoma imzoladi.

Limaning transfermarkt.com portalidagi narxi 200 ming yevroni tashkil qiladi. Uning maksimum narxi 2015 yili 400 ming yevrogacha chiqqan.

Qahramonimiz faoliyati davomida klublar miqyosida umumiy hisobda 187 o‘yinda maydonga tushib, raqiblar darvozasiga 44 bor yo‘l topgan. Mateus Lima Kruz shu kunga qadar 7 ta jamoa sharafini himoya qilgan. Debyutini 2012 yili boshlagan markaziy hujumchi 12 bor klubini o‘zgartirgan.

Uning oxirgi 5 yillikdagi karerasiga e’tibor qaratsak, 3 jamoada 114 uchrashuv o‘tkazib, 23 ta gol urgan.

2018 yilning yozida Mateus Lima Xorvatiya Birinchi ligasi vakili “Slaven Belupo” bilan ikki yillik shartnoma imzoladi. 51 o‘yinda 7 bor darvozani ishg‘ol qildi.

2020-2021 yilgi mavsumni Isroilning “Xapoel Nof HaGalil” klubida o‘tkazdi. 29 uchrashuvda 9 gol urdi.

Keyingi mavsum esa bu mamlakatning boshqa jamoasi “Hapoel Rishon LeZion” klubida to‘p tepdi. 34 bellashuvda 7 ta to‘p kiritdi.

“Nasaf” legioneriga aylangan Lima 2020-2021 yili eng ko‘p golini urgandi - 9.

Futbolda statistika, raqamlar ko‘p narsani anglatadi. Ayniqsa, yurtimizga xorijdan kelayotgan legionerlar borasida. Ushbu raqamlardan bitta xulosaga kelishim mumki: “Nasaf”ga kelgan legionerning nomi ulug‘, suprasi quruq. Futbolchi braziliyalik ekanligini inobatga olmasa, klublarda nimadir karomat ko‘rsatmagan. Hamma braziliyaliklar ham Ronaldo, Neymar bo‘lavermaydi.

Boz ustiga bu futbolchi legionerlarni chertib-chertib tanlaydigan Ro‘ziqul Berdiyev jamoasiga kelmoqda. Xorijliklar borasida o‘ta sinchkov murabbiy bu tanlovni qabul qilishda nimalarga e’tibor qaratgani shaxsan men uchun qiziq. Balki bu klub rahbariyatining qarori bo‘lishi mumkin. Lekin bitta fakt shuki, Lima "Nasaf"ning barcha futbolchilaridan gavdali va baland bo‘yli!

Klub bu transfer orqali ikkinchi qavatdagi ustunlikni qo‘lga olishni maqsad qilgandir. Biroq qarshiliklarning raqiblari "Paxtakor", "Navbahor", "So‘g‘diyona", AGMKga e’tibor qaratsak, ularning barchasida baland bo‘yli markaziy himoyachilar bor. Lima ulardan ustunlik qilishi qiyin masalaga o‘xshamoqda.

Bir mavsum davomida ko‘pi bilan 9 ta gol urgan legioner yuqorida bildirgan fikrlarimizni ikkinchi davradagi o‘yinlari bilan asossiz ekanligini isbotlab bersa, biz bundan faqat xursand bo‘lamiz. Chempionatimizga saviyali legionerlar kelishining tarafdorimiz xolos.


Manba: Sports.uz “Zamin” yangiliklarini “Vkontakti”da kuzatib boring