Vadim Abramov: "Oʻzbek futbolining darajasi past. Bu esa terma bosh murabbiyiga bosh ogʻriq boʻlyapti"

Coca Cola Superliganing 18-turi doirasida "Lokomotiv" - "Dinamo" uchrashuvidan keyin mehmonlar bosh murabbiyi Vadim Abramov oʻz fikrlarini bildirdi.

- Oʻyin uchun tanlangan rejamiz bor edi. Yigitlar bundan chiqmaslikka harakat qilishdi. Yutishimiz ham magʻlub boʻlishimiz ham mumkin edi. 1:1 hisobi uchrashuvning qanday boʻlganini koʻrsatib bera oladi. Chiroyli oʻyin koʻrsatdik deb ayta olmayman. Buning uchun bizni oʻqqa tutishingiz shart emas. Muhim ochko.

- Ikkinchi taymda jarohat olib, almashtirilgan futbolchining holati qanday?
- Mushagini choʻzib olgan deb oʻylayapman. Toʻgʻrisi hozircha bilmayman. Ertaga oʻzini qanday his qilishi orqali barchasini bilib olamiz.

- Elguja Grigalashvili oʻzining yaxshi jismoniy holatida emas.
- U bugun birga-bir vaziyatda gol ura olmayotgani uchun shunday deyapsizmi? Biz hozirgi kunda koʻp kuch sarflaydigan futbol namoyish qilyapmiz. Kam toʻp bilan boʻlganimiz uchun raqibdan koʻp yuguryapmiz. Elguja esa toʻpni sevuvchi futbolchi hisoblanadi. Toʻpsiz yuguraverib charchaganingizdan keyin esa toʻp bilan oʻyiningiz chiqmaydi. Ammo u oʻsha vaziyatda gol urganida barchasi boshqacha boʻlib ketardi.

- Bu Sizning jamoadagi ilk ochkoingiz. Bundan qanchalik mamnunsiz?
- Aytganimdek, oʻyin uchun tanlangan reja oʻzini oqladi, bizning foydamizga ishladi. Ajablanmagan jihatim, birinchi boʻlib gol urdik. Shuningdek, magʻlub boʻlmaganimizdan mamnun boʻldim. Chunki bunga qadar bir necha marta hisobda oldinda boʻla turib, yutqazib qoʻygandik. Bugun ham hisobni ushlab qolishimiz mumkin edi. Biroq 1:1 hisobi vaqtida futbolni bunday oʻynashmaydi. Bunday oʻynayversak, bizni ertaga qattiq jazolashadi.

- Sobiq jamoaga qarshi oʻynash murabbiyga bosim beradimi yoki motivatsiya?
- Bosim ham, ishtiyoq ham boʻlmadi. Jamoadagi bir necha futbolchilarni bilaman, ular mening qoʻl ostimda tarbiya topgan. Shunchaki ularning kuchli tomonlarini yaxshi bilishim mumkin.

- Telefoningiz ringtonidagi "Assalomaleykum, boy ota" qoʻshigʻi hali ham turibdimi?
- Yoʻq, bu era tugadi. Oʻsha telefonni qaerdadir yoʻqotib qoʻydim. Koʻrdingizmi, oʻsha telefonni yoʻqotdim, omad ham tark etdi.

- Jamoaning Superligada qolish imkoniyatlarini qanday baholaysiz?
- Matematik jihatdan imkoniyatlarimiz bor. 5 oʻyinda yutishimiz kerak. Afsuski, bunga resurslarimiz etmasligi mumkin.

- Demak, oldindagi 6 oʻyinning 5tasida yutish kerak.
- 8ta oʻyin bor. Ichimda "hammasi tugadimi", degan fikr ham oʻtdi. Oʻyinni kuchaytira olmayapmiz. Ustiga ustak himoyachimiz ham safdan chiqishi mumkin.

- Chempionlik uchun kurashni qanday baholaysiz?
- Oʻzbek futbolining darajasi unchalik yuqori emas. Buning yuqoriroq boʻlishini istayman. Barchasini koʻrib boryapman. Bu esa milliy terma bosh murabbiyi uchun ham haqiqiy boshogʻriq boʻladi.

- Jamoangizda oʻsish koʻrinyaptimi?
- Bugun magʻlub boʻlmadik. Rivojlanish shunda xolos. Ikki marta hisobda oldinda borib, magʻlub boʻldik. Balki ayrim narsalar yigitlarning ruhiy holatiga bogʻliqdir. Buning barchasi biz oʻyinlarda koʻp kuch sarflayotganimiz bilan bogʻliq. Oʻzimiz futbol oʻynamayapmiz, birovlarga ham futbol oʻynashiga bermayapmiz. Toʻpni tepib yuboryapmiz, keyin nimadir qilishga harakat qilyapmiz.

- VAR tizimi haqida nima deya olasiz?
- Hozircha juda yomon ishlayapti. VAR bilan biz bir taymni 46 daqiqa oʻynayapmiz. Toʻp autga chiqqanidan keyin bosh hakam quloqchinini ushlab, VAR tizimidagilarga murojaat qilmoqda. Menimcha barchasi internetga bogʻliq. Vaziyatlarni etkazib berish uchun internet tezligimiz pastlik qilyapti. Hakamlarimiz buni oʻrganib olishini kutamiz. “Zamin” yangiliklarini “Telegram”da kuzatib boring