Davlat Bobonov: «Prezidentimiz finalni tomosha qilib turganda, yutqazishga haqqim yoʻq edi»

Toshkentda oʻtayotgan dzyudo boʻyicha jahon chempionatida -90 kg vazn toifasida ilk marta jahon chempioni boʻlgan Davlat Bobonov finaldan keyin prezidentning hal qiluvchi bellashuvga kelgani va chempionlikka erishgani haqida gapirdi.

«Jahon chempionati – hech qachon shunchaki oʻtmaydigan, qiyin musobaqa. Xudoga shukur, bugun oltin medalni yutib oldim. Finalgacha boʻlgan bahslarga juda katta tayyorgarlik koʻrgan edik. Finalga chiqqanimdan keyin hurmatli bosh vazirimiz kelib, shaxsan hurmatli prezidentimiz finalni tomosha qilish uchun kelishlarini aytdilar. Bu sportchi uchun juda ham katta motivatsiya. Buni eshitib, finalga chiqdim. Prezidentimiz tomosha qilib turganda yutqazishga haqqim yoʻq edi», - deydi jahon chempioni Davlat Bobonov.

pic.twitter.com/5IoXW2LIkT

— Shuxrat Razzakov (@ShuhratRazzakov) October 11, 2022

Samarqand dzyudo maktabi tarbiyalanuvchisi sanalmish Bobonov bugungi kurashlarda dastlab slovakiyalik Peter Zilkadan ustun kelgan boʻlsa, soʻng janubiy koreyalik Jeu Op Xanni ippon evaziga magʻlub etdi. Chorakfinalda esa bolgariyalik Ivaylo Ivanov ham ippon bahosi bilan taslim etildi. Murosasiz oʻtgan yarimfinal bahsida esa gruziyalik Lasha Bekauridan ustun kelgan oʻzbekistonlik dzyudochi finalga chiqib, Kristian Parlatini magʻlubiyatga uchratdi.

Ma'lumot uchun, 25 yoshli sportchi Tokio-2020 Olimpiadasida bronza medalini qoʻlga kiritgan edi. 2021 yilda esa Budapeshtda oʻtgan dzyudo boʻyicha jahon chempionatida kumush medali, Bishkekdagi Osiyo chempionatida esa oltin medalga ega chiqqandi. “Zamin” yangiliklarini “Telegram”da kuzatib boring