Mutaxassis Kubok finali oldidan "Nasaf"ning "Navbahor"dan ustun tomoni nimada ekanini aytdi

30 oktyabr kuni hamma kutayotgan oʻyin – Oʻzbekiston Kubogi finalida “Nasaf” hamda “Navbahor” oʻrtasidagi jiddiy kurashni koʻramiz. Buxoro stadioni mezbonlik qiladigan mazkur toʻqnashuv haqida hozir ortiqcha ta'rif berish shart emas. Buni Roʻziqul Berdiev va Samvel Babayan oʻrtasidagi oʻziga xos bahs deb atasak ham mubolagʻa boʻlmasa kerak.

Jamoalar bir-birlarini yaxshi bilishadi. Shubhasiz, 30 oktyabr kuni barchamizni ajoyib oʻyin kutmoqda. Muxlislarimizga yaxshi tanish boʻlgan mutaxassislardan biri Jamshid Saidov final oldidan jamoalarning imkoniyati, kuchli jihatlari va yana boshqa jihatlar boʻyicha oʻzi fikrlarini bildirdi.

- Oʻzbekiston Kubogi finaliga hamma jamoalar ham etib kela olmaydi, - deya gap boshladi, Saidov. - Bunday bahs oldidan “Nasaf” yoki “Navbahor” yutadi, deb aytib boʻlmaydi. Ikkala jamoa ham betaraf maydonda oʻynaydilar. Ikkala jamoa ham hozir yaxshi holatda. Jiddiy tayyorgarlik koʻrishayotgani aniq. Faqat shuni ishonch bilan aytishim mumkinki, ikkala jamoa futbolchilari bor kuchini ishga solishdi. Bu final, tamom! Hammasi oʻz nomiga yarasha oʻtadi. Asabiy uchrashuv boʻladi. Imkoniyatlarni 50x50 baholayman. Oxirgi paytlarda oʻyinlarni oldindan taxmin qilayotgandim, ammo natijalar umuman boshqacha boʻlyapti.

Masalan, “Navbahor” “Olimpik”ni oʻz uyida yutadi, deb oʻylagandik. U erda bosim bor, muxlislari bor, degan holatda shunday fikr bildirgandik. “Olimpik”ning yoshlarini qanday oʻynashini oldindan bilib boʻlmaydi. Ular nobarqaror. Ammo Namangandagi oʻyinni koʻrgan boʻlsangiz, “Navbahor” zoʻrgʻa hisobni tenglashtirib oldi. “Paxtakor” xursand boʻldi. Chunki “Nasaf” bilan “Navbahor” durang oʻynadi. Chempionlik uchun juda jiddiy kurash kechyapti. Kubok finalida boya aytganiimdek, imkoniyatlar teng. Ikkala jamoa ham kuchli. “Nasaf”dagi futbolchilar biroz yoshroq. “Navbahor”da tajribaliroq oʻyinchilar bor. Nazarimda, uchrashuv penaltilar seriyasigacha choʻzilmaydi va hammasi 90 daqiqa ichida hal boʻlsa kerak.

Toʻgʻri, ikkala jamoa ham chempionatda durang oʻynab qoʻydilar. Bu holni ularni bor e'tiborini Kubok finaliga qaratgani bilan izohlamagan boʻlardim. Gʻalaba uchun bor kuchlarini berishdi. Chempionlik uchun kurashda “Nasaf” bilan “Navbahor” bir-biriga jiddiy raqobat hosil qilishgan. Endi Kubok finalida toʻqnash kelishadi. Final oldidan faqat shuni aytishim mumkin, “Navbahor”ga nisbatan “Nasaf”ning tajribasi koʻproq. Nega deganda, “Nasaf” Kuboklarda koʻp oʻynagan. OFK Kubogi, Oʻzbekiston Kubogi va Superkuboklarini aytsa boʻladi. Ayniqsa, finallarda koʻp oʻynagan, kerak paytda gʻolib ham chiqqan. Shu tarafdan qaraganda, “Nasaf”ni “Navbahor”ga nisbatan tajribasi koʻproq. Biz chetdan kuzatganimizda, koʻproq chiroyli futbolga e'tibor qaratamiz.

“Nasaf” klubi tezkor va kombinatsiyalarga boy oʻyin namoyish qiladi. Himoyadan hujumga ham tez oʻtib ketadi. “Navbahor” esa koʻpincha pozitsiya boʻylab oʻynaydi. Ammo oʻylaymanki, finalda ikki jamoa ham qarshi hujumda oʻynamaydi. Klublar hujumkor oʻyin koʻrsatadilar. Bu Kubok finali boʻlgani uchun ikkala murabbiylar maksimal darajada tavakkalchilikka qoʻl uradilar. Roʻziqul Berdievni yaxshi bilamiz, u hech qachon qarshi hujumda oʻynamaydi. Aksincha, “Navbahor”ni qarshi hujumlarda oʻynagan paytlari boʻlgan. Yana bir tomoni borki, “Nasaf” jismoniy tomondan “Navbahor”dan kuchliroq.

“Nasaf”ni ham, “Navbahor”ni ham tarkibini yaxshi bilamiz. Oʻylaymanki, finalda jamoalar tarkiblarida katta oʻzgarishlar boʻlmaydi. Asosiy tarkibdagi oʻyinchilardan foydalanishadi. Barchasi maksimal darajada harakat qiladi. 11 nafar futbolchining hammasi bor kuchini ishga solishlari aniq. Yaxshi oʻyin boʻlishi kerak. Buxorodagi stadion va uning chimi ajoyib holatda. Albatta, jamoalarning tiklanishi uchun vaqt kam. Ammo bitta oʻyin uchun klublar kerakli reja asosida tiklanishyapti, deb oʻylayman, - deydi Jamshid Saidov. “Zamin” yangiliklarini “Telegram”da kuzatib boring