Oʻzbekistonlik 12 yoshli shaxmatchi raqibini dovdiratib qoʻydi (video)

Rapid va blits boʻyicha Olmaotada (Qozogʻiston) boʻlib oʻtgan jahon chempionatida Humoyun Bekmurodov hammani hayratga soldi. Bu haqda Oʻzbekiston shaxmat federatsiyasi raisi Alisher Sa'dullaev ma'lum qildi.

12 yoshli oʻzbekistonlik shaxmatchi Uels vakili Elijah Everettga qarshi oʻyini durrang bilan yakunlanishi kutilayotgan edi. Biroq oʻyinni Humoyun oʻzining chiroyli gʻalabasi bilan yakun yasashga muvaffaq boʻlgan.

“Qiziq jihati, Everett oʻz magʻlubiyatini anglashga ham ulgurmay qoldi va bu holat dunyo shaxmat ixlosmandlarining e'tiborini tortdi”, - deya yozadi Sa'dullaev.

Eslatib oʻtamiz, oʻtgan yil fevralida Humoyun Bekmurodov Xalqaro shaxmat federatsiyasi (FIDE) sport ustasi unvoniga sazovor boʻlgan edi. Shuningdek, u Gretsiyadagi shaxmat boʻyicha yoshlar oʻrtasidagi jahon chempionatida "Open12" guruhida ham rapid, ham blits boʻyicha kumush medal sohibi boʻlgan edi. “Zamin” yangiliklarini “Telegram”da kuzatib boring