Shomurodovni ertaroq tushirish kerak edi! Uning 10 daqiqalik o‘yini necha ballga baholandi?

Leonardo Semplichi qo‘l ostiga o‘tganidan keyin “Spetsiya”ning uchta o‘yindan iborat mag‘lubiyatsiz seriyasiga yakun yasaldi.

Liguriyaliklar “Udineze” va “Verona” bilan durang o‘ynab, katta jamoalardan “Inter”ni mag‘lub etganidan keyin ancha shov-shuv ko‘targandi.

27-turda Semplichi shogirdlari “Saussuolo” mehmoni bo‘ldi. Mezbonlar g‘alabasini Domeniko Berardi tomonidan 71-daqiqada penaltidan kiritilgan gol ta’minladi.

Leonardo Semplichi Eldor Shomurodovni 80-daqiqada maydonga tushirdi. Eldor o‘yinni kuchaytirdi, lekin berilgan vaqt kamlik qildi.

Nufuzli nashrlardan biri - https://www.calciomercato.com sayti “Spetsiya” futbolchilarining o‘yinini quyidagicha baholadi.

Dragovski 6,5:

Tajribali darvozabon ishonchli o‘ynadi. Raqib futbolchilaridan Enrike va Rojerioning gol urishiga yo‘l qo‘ymadi. Berardining 11-metrlik belgidan tepgan to‘pini qaytarishga intildi. Qo‘pol xatolar kuzatilmadi.

Amyan 5,5:

“Sassuolo” futbolchisining zarbasini qaytarib qoldi. Raqiblar bilan raqobatda yutqazmadi. Faqat uning aybi bilan penalti belgilandi. Mana shu vaziyat o‘yin taqdirini raqib foydasiga hal qildi.

Kaldara 6:

Xatosiz o‘ynadi. Pinamonti va Lorente bilan raqobatda ularga hech qanday imkoniyat qoldirmadi.

Ampadu 6:

Jamoadoshlarining kamchiliklari va xatolarini yopishga urindi. Zarba berishda faol bo‘ldi. Biroq, bularning bari mag‘lubiyatdan qutilib qolishga yetarli bo‘lmadi.

Nikolau 5.5:

Berardini to‘xtatib qolish uchun ko‘p mehnat qildi. Biroq, aksariyat vaziyatlarda jamoadoshlariga to‘pni vaqtida yetkazib bermadi. Buning oqibatida jamoa pressing ostida qolib ketdi.

Burabiya 6:

Ancha erkin harakat qildi. Keng maydon bo‘ylab o‘ynadi.

Verde 6:

Burabiya o‘rniga maydonga tushib, “Spetsiya”ning o‘ng qanotini kuchaytirdi.

Ekdal 5.5:

Birinchi bo‘limda Enrikega yetarli darajada qarshilik ko‘rsata olmadi. Ikkinchi bo‘limni yaxshi boshladi. Biroq, jismoniy holati tufayli joyini bo‘shatib berdi.

Espozito 5,5:

Ekdal o‘rniga maydonga tushib, o‘zini ko‘rsata olgani yo‘q.

Gyasi 5,5:

Kutilgan o‘yinni namoyish qila olmadi. Mezbonlar vakili Rojerioga raqobatni boy berdi.

Shomurodov 6:

Gyasi o‘rniga 80-daqiqada maydonga tushgan Eldor Shomurodov o‘yinni jonlantirdi. Bir vaziyatda darvoza tomon bergan zarbasi yo‘liga himoyachi to‘g‘anoq bo‘ldi. Mutaxassislar Semplichi Daniele Verde va Eldor Shomurodovni ertaroq o‘yinga tushirishi kerak edi, deb ta’kidlamoqda. Gol urishi uchun vaqt yetishmadi.

Agudelo 6:

Aksariyat yakkakurashlarda g‘olib chiqqan bo‘lsa-da, ayrim vaziyatlarda Lopesga yetarli darajada qarshilik ko‘rsata olmadi.

Sipot  5.5:

Maldinidan ancha dadil o‘ynadi. Lekin bu samara keltirgani yo‘q.

Maldini  5.5:

Maldini chiroyli o‘ynashga harakat qildi. To‘pni yaxshi boshqardi. Lekin bu gal gol ura olgani yo‘q.

Zurkovski 5.5:

Bir so‘z bilan aytganda Maldini o‘rniga maydonga tushib, kutilgan o‘yinni ko‘rsata olmadi.

Nzola 6:

Birinchi bo‘limda “Sassuolo” darvozasiga katta xavf solib turibdi. Himoyachi Ferrari uni to‘xtatishga qiynaldi. Lekin ikkinchi bo‘limda Nzola oldingi chiziqda yolg‘izlanib qoldi.

Semplichi 5.5:

Tarkib tanlashida barqarorlik yo‘q. Dragovski bo‘lmasa, jamoa qiynalib qolardi. “Sassuolo”ga qarshi uchrashuvni Shomurodov va Verdeni o‘yinga tushirish orqali qutqarib qolmoqchi bo‘ldi. Bu o‘zgarish vaziyatni “Spetsiya” foydasiga og‘dirishi mumkin edi. Lekin o‘yinchi almashtirish ancha kech amalga oshirildi. Shomurodovni ertaroq bahsga qo‘shish kerak edi.

“Zamin” yangiliklarini “Facebook”da kuzatib boring