A Seriyaning 28-turidan o‘rin olgan “Spetsiya” va “Salernitana” o‘rtasidagi uchrashuv ancha qizg‘in kechdi. Mezbonlar bellashuvning 70-daqiqasiga qadar mag‘lubiyat xavotirida o‘tirdi.
Birinchi bo‘lim “Salernitana” ustunligida o‘tdi. Mezbonlar himoyachisi Mattia Kaldara tanaffusga bir necha daqiqa qolganida raqib hujumini bartaraf etish chog‘ida o‘z darvozasini ishg‘ol qilib qo‘ydi.
“Spetsiya” mag‘lubiyatdan qutilib qolish ilinjida ikkinchi bo‘limda hujumkorlikni kuchaytirdi. 70-daqiqaga kelib, “Salernitana” safida eng yaxshi o‘yin namoyish qilib kelayotgan Lorenso Pirola qo‘pol xatoga yo‘l qo‘ydi. U jamoadoshi uzatgan to‘pni to‘xtata olmadi va bu vaziyatdan unumli foydalangan Eldor Shomurodov chiroyli gol urib, jamoasiga bir ochko keltirdi – 1:1.
“Spetsiya” faoliyatini yoritib kelayotgan https://www.calciospezia.it nashri jamoa futbolchilarining o‘yinlarini baholadi.
Bartlomey Dragovski 6:
O‘yin davomida faqatgina jamoadoshi Kaldaraning kutilmagan zarbasi qarshisida ojiz qoldi xolos. Bir marta “Spetsiya”ni muqarrar goldan qutqardi. Ancha xotirjam va ishonchli o‘ynadi.
Kelvin Amyan 6:
Himoyadagi vazifalaridan tashqari, o‘z qanotidan hujum uyushtirishda ham faol bo‘ldi. Aksariyat vaziyatlarda tezligi pastligi pand berdi.
Itan Ampadu 7:
Himoyachilar to‘rtligi orasida eng yaxshi o‘ynagani Ampadu bo‘ldi. O‘zi mas’ul bo‘lgan zonada toza o‘ynadi, barcha hujumlarni bartaraf etdi, raqib hujumchisi Kshishtof Pyontikka o‘yin bermadi. Yarim himoyaga o‘tib o‘ynagan paytda ham ishonchli harakat qildi.
Mattia Kaldara 5:
Uchrashuvning birinchi qismida bo‘sh o‘ynadi. Pyontekka uzatilgan to‘pni o‘tkazib yubordi va kutilmaganda o‘z darvozasini ishg‘ol qilib qo‘ydi. Ikkinchi bo‘limda ancha faol harakat qildi. Raqibning gol urishiga yo‘l qo‘ymadi. Biroq, birinchi bo‘limdagi xatosi jamoaga qimmatga tushdi.
Dimitrios Nikolau 6:
Markaziy himoyachi chap qanotda o‘ynashiga to‘g‘ri keldi. Raqib aynan mana shu qanotdan ko‘p bosim uyushtirdi. Buning oqibatida Nikolau o‘yin oxiriga borib charchab qoldi va o‘rnini Bastoniga bo‘shatib berdi.
Simone Bastoni 6:
Bu futbolchining maydonga qaytganining o‘zi katta yangilik bo‘ldi. Bu o‘yinchi chempionatning muhim pallasida hali ko‘p qo‘l keladi. O‘yinda ikkita chiroyli pasi bilan o‘zini ko‘rsatdi.
Mehdi Burabiya 6.5:
Birinchi bo‘limda ko‘p jamoadoshlari kabi juda sekin harakat qildi. Lekin keyin jamoaning motoriga aylandi. “Salernitana” hujumlarini to‘xtatib qolib, o‘z jamoasini oldinga boshladi. Maydon markazida ustunlikni ta’minladi.
Albin Ekdal 6:
Keyingi ikki hafta davomida jismoniy tayyorgarlik borasidagi muammolar o‘z ta’sirini o‘tkazayotgani birinchi bo‘limda ko‘rinib qoldi. O‘yinning ikkinchi yarmida o‘zini o‘nglab oldi, oldingi chiziqqa aniq paslar bera boshladi.
Viktor Kovalenko 5:
Hujumkorlikni ta’minlashi talab etilgan edi. Birinchi bo‘limda buni uddalay olmagani uchun tanaffusdan keyin joyini Jurkovskiga bo‘shatib berdi.
Shimon Jurkovski 5:
Polshalik yarim himoyachi ham o‘zidan kutilgan o‘yinni namoyish qila olmadi. O‘yinga kirishib ketishga qiynaldi. Ancha bo‘sh o‘ynadi.
Daniele Verde 5.5:
Verde katta tajribaga ega bo‘lgan sifatli futbolchi. Aniq paslari bilan jamoasi ustunligini ta’minlay oladi. Lekin uning mahorati bu gal ish bermadi. Natijada tanaffusdan keyin maydonga qaytmadi.
Daniel Maldini 7:
Maldinilar sulolasining kenja vakili o‘yinni sezilarli darajada kuchaytirdi. Bir necha raqiblarni aldab o‘tish, Gilermo Ochoa darvozasiga zarba berish orqali ko‘zga tashlandi. Jarima zarbasi darvoza to‘siniga tegib qaytdi.
Eldor Shomurodov 7:
Birinchi bo‘limda o‘yindan chetda qoldi. Bir marta bosh bilan zarba berdi. To‘p darvoza to‘sini ustidan o‘tib ketdi. Ikkinchi bo‘limda ancha faollashdi. Hujumga o‘tishdan tashqari, ortga qaytib, himoyalanishga ham yordam berdi.
70-daqiqada raqib himoyachilari xatosidan ustalik bilan foydalanib qoldi. To‘pni darvozabon Gilermo Ochoa ustidan oshirib, hisobni tenglashtirdi. “O‘zbek Messisi”ning “Spetsiya”dagi debyut goli juda chiroyli chiqdi.
Emmanuel Gyasi 5.5:
Birinchi bo‘limda Eldor Shomurodov va Viktor Kovlenkoga juda chiroyli pas oshirdi. Lekin qolgan daqiqalarda hujumda ko‘rinmay qoldi. Natijada 54-daqiqada o‘rnini Agudeloga bo‘shatib berdi.
Kevin Agudelo 7:
Maydonga tushishi bilan xavfli zarbalar yo‘llay boshladi. Raqibni pressing qilishda faollik ko‘rsatdi. Hujumchilarni qulay pozitsiyaga chiqardi. “Spetsiya” o‘yinini sezilarli darajada kuchaytirdi.
Leonardo Semplichi 6.5:
Bosh murabbiy o‘yin oldidan tarkib tanlashda muammoga duch keldi. Asosiy to‘purar Mbala Nzola diskvalifikatsiya qilingan. Boshlang‘ich tarkib vakillaridan bir nechtasida jarohat bor. Ekdal va Agudeloning jismoniy holati yaxshi emas. Ko‘p o‘yinchilar terma jamoaga chaqirtirilgani bois, guruh mashg‘ulotlarida qisqa muddat qatnashdi. Shunga qaramay, Semplichi ikkinchi bo‘limda taktik o‘zgarishlar orqali jamoa o‘yinini kuchaytira oldi va Eldor Shomurodovning goli evaziga mag‘lubiyatdan qutilib qoldi.
“Zamin” yangiliklarini “Instagram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Organizm o‘zini toksinlardan qanday tozalaydi?
Rashida Tolib Kongress a’zolariga «achchiq haqiqat»ning suratini ko‘rsatdi
Shimoliy Koreya Rossiyaga uzoqqa zarba beruvchi qurollar yubordi
Ijtimoiy tarmoqlar davrida ruhiy salomatlikni qanday saqlash mumkin?
Bayden va Jinping Peruda uchrashdi: «Agar bir-birimizni raqib deb bilsak, munosabatlarni buzamiz»
KXDR Rossiyaga 100 minggacha harbiy yuborishi mumkin
Eron AQSHdan 1 trln dollar kompensatsiya talab qildi
Turkiya Isroil prezidenti samolyotini havo hududiga kiritmadi
