19:09 / 13.05.2023

Xodimlar o‘rtasida sog‘lom turmush tarziga erishilmoqda

Yurtimizda sportni ommaviyligini yanada ta’minlash, aholi ayniqsa turli soha vakillari o‘rtasida uni keng targ‘ib etish, qiziqqan yo‘nalishlarda shug‘ullanishlari har tomonlama qo‘llab-quvvatlanmoqda. Prezidentimizning 2020 yil 30 oktyabrdagi “Sog‘lom turmush tarzini keng tatbiq etish va ommaviy sportni yanada rivojlantirish chora-tadbirlari to‘g‘risida” gi Farmoni ijrosi bu borada muhim ahamiyat kasb etmoqda.

Jumladan, Majburiy ijro byurosi Namangan viloyat boshqarmasi va uning tizimida mehnat qilayotgan tezkor va texnik xodimlar o‘rtasida turli sport musobaqalari tashkil etilayotgani samara bermoqda.

Ana shunday musobaqalardan biri O‘zbekiston Respublikasi Bosh prokuratura huzuridagi Majburiy ijro byurosi tashkil etilganligining 6 yilligi munosabati bilan tashkil etildi. Namangan viloyat yoshlar siyosati va sport bosh boshqarmasi ko‘magida kasaba uyushmalari tashkilotlari birlashmasi bilan hamkorlikda sportning yugurish, suzish, shaxmat va shashka turi bo‘yicha o‘tkazilgan musobaqada ishtirokchilar bahs olib borishdi.

“Barkamol avlod” sport majmuasi mezbonlik qilgan musobaqaning har bir turlari ishtirokchilar va muxlislarda katta qiziqish uyg‘otdi. Ayniqsa, 100 va 200 metrga yugurish, suzish turlari anchayin qiziqarli kechdi. Yakuniy natijalarga ko‘ra suzish bo‘yicha B.Qo‘ziyev, yugurish musobaqasida esa A.Mo‘minovlar faxrli birinchi o‘rinni qo‘lga kiritishdi. “Aql gimnastika” deya nom olgan shaxmat yo‘nalishida M.Mullaxov, shashka bahslarida esa O.Po‘latovlar g‘olib bo‘lishdi.

Musobaqalar yakunida g‘olib va sovrindorlarga boshqarma va boshlang‘ich kasaba uyushma qo‘mitasining diplom hamda qimmatbaho sovg‘alari tantanali topshirildi.