Bekzod Abdurahmonov UFCga qachon o‘tishi, navbatdagi jangi va menejeri borasida so‘z yuritdi

Erkin kurash bo‘yicha Olimpiada hamda jahon chempionati bronza medali sohibi, Osiyo o‘yinlari va Osiyo chempionati g‘olibi Bekzod Abdurahmonov MMA bo‘yicha ham jang o‘tkazishidan xabaringiz bor. Hozirga kelib, u 7 ta jangda (So‘ngi jangi ko‘rsatkichlarni qayd etib boruvchi saytlardan hali o‘rin olgani yo‘q) ishtirok etib, barchasida g‘alaba qozongan. U so‘ngi jangini 17 iyun kuni Combat FC promoushenida o‘tkazib, braziliyalik De Freytasni 1-raundning o‘zidayoq taslim etgandi. Xullas, biz Bekzod bilan bog‘lanib, unga bir nechta savollar bilan murojaat qildik.

- MMA yo‘nalishida navbatdagi g‘alabangiz bilan tabriklaymiz!

- Rahmat.

- Demak, buyog‘iga bor diqqat-e’tiboringizni MMAga qaratasiz?

- Albatta, MMAga jiddiy yondashaman. Biroq, yozda boshqa jang o‘tkazmayman. Sababi, oldimizda jahon chempionati va osiyo o‘yinlari bor. Shu musobaqalarga tayyorgarlik ko‘raman.

- AQShda juda ko‘p mashhur zallar bor. Balki siz ulardan birida mashg‘ulotlar olib borayotgandirsiz?

- “Brodway jiujitsu” zalida mashg‘ulotlar olib boraman. Bu erdan ham UFCda jang qilganlar bor. Hozir yodimda yo‘q, Zabit Magomedsharipov bilan bahs yuritgan bollar mashg‘ulotlar olib boradi.

- So‘ngi jangingizdan keyin, balki yanada nufuzliroq promoushenlar haqida o‘ylayotgandirsiz?

- Oldimda turgan musobaqalardan keyin yana bir-ikkita jang o‘tkazaman. Shundan keyin UFCda jang qilish niyatidaman.

- UFC bilan shartnoma tuzish osonmas, menejer sifatida kim bilan ishlash niyatidasiz?

- O‘zimning menejerim Joy Kave barchasini hal qiladi. U Dana Uayt bilan juda qadrdon. Shunchaki men o‘zim yana bir-ikkita jang o‘tkazmoqchiman. Chunki UFCda eng kuchlilar jang qiladi. Shunday ekan, tajribamni oshirib olishim kerak.

- Bu borada sizga omad tilaymiz!

- Rahmat. Nasib qilsa, MMAda ham yaxshi natijalar qilishga harakat qilamiz.