17:11 / 01.10.2023

"Al Sadd" bosh murabbiyi "Nasaf"ga qarshi o‘yin uchun alohida sxema ishlab chiqqanini aytdi

^{Foto: championat.asia}

OCHL guruh bosqichi 2-turi doirasida "Nasaf"ga qarshi o‘yin oldidan "Al Sadd" bosh murabbiyi Brunu Pineyru hamda jamoa futbolchisi Paulo Otavio ishtirok etdi.

- Biz bu yerga g‘alaba uchun keldik. Biroq bizni qiyin o‘yin kutib turibdi. Hozirgi futbolda oson o‘yinning o‘zi yo‘q. Ligadagi barcha jamoalar o‘yin tashkillashtirish bobida juda shakllangan. Shu boisdan ertangi o‘yin oson o‘tmaydi.

Paulo Otavio: - Chempionlar ligasida barcha uchrashuvlar qiyin o‘tadi. So‘nggi o‘yinlarda yaxshi natijalar bo‘lmadi. O‘tgan uchrashuvlardagi salbiy natijalardan keyin ijobiy natija qayd etishga harakat qilamiz.

- Bir vaqtlar jamoada Xavi ishlagani va hozirgi "Al Sadd"ning kuchini qanday baholaysiz?

- Birinchi farq - murabbiyda. Hozir jamoaning murabbiyi boshqa. "Al Sadd" ruhiy jihatdan doimo g‘alaba qozonish uchun harakat qilib kelgan. Balki murabbiy o‘zgargandir, futbolchilar o‘zgargan, lekin jamoaning o‘yinga bo‘lgan qarashi o‘zgargani yo‘q. Har bir bahsda g‘alaba qozonish uchun maydonga tushamiz. Hozir "Nasaf" bizdan ikki ochko oldinda bormoqda. Masalan, oldingi "Nasaf" bilan hozirgisini taqqoslamagan bo‘lardim. Chunki hozir kelajak haqida o‘ylash kerak. Biz bu yerga g‘alaba uchun kelganmiz.

- "Nasaf" jamoasi OCHLda boshqacha, O‘zbekiston chempionatida boshqacha o‘yin namoyish qiladi. Raqibingizning o‘yinlarini qanchalik o‘rganib chiqdingiz?

- Albatta, "Nasaf"ning o‘yinlarini taxlil qilib chiqdik. Jamoa juda zich himoyalanadi, to‘pni yaxshi nazorat qiladi va yo‘qotmaslikka harakat qiladi. Himoyadan chiqishda ham yaxshi o‘ynaydi. "Nasaf"ning OCHL va O‘zbekiston chempionatida boshqacha o‘yin ko‘rsatishiga sabab oddiy - ular O‘zbekiston chempionatida eng kuchli jamoalardan biri. Ertangi o‘yinda "Nasaf"ning to‘pni ushlab turishi borasidagi taktikasi uchun sxema ishlab chiqqanmiz. Ya’ni, raqibga to‘pni ushlab turishga bermaslikka va himoyadan hujumga o‘tishda tezkor bo‘lmasligiga harakat qilamiz.

- "Al Sadd"ning tarkibida yo‘qotishlar bormi?

- Jamoada yo‘qotishlar bor. Umuman olganda, har qanday yo‘qotishlar bo‘lsa ham zaxiradagi istalgan futbolchi jamoaning g‘alabasiga munosib hissa qo‘shishga tayyor turishi kerak. Tarkibimizda istalgan yo‘qotishning o‘rnini bosa oladigan futbolchilar yetarli.

- "Nasaf"ning ko‘rsatadigan o‘yinini Qatar chempionatidagi qaysi jamoaga qiyoslasa bo‘ladi va ushbu jamoaga qarshi o‘yin Siz uchun qanchalik qulay yoki noqulay?

- Yaxshi savol bo‘ldi. Ertangi o‘yinda "Nasaf" qanday taktikada o‘ynashini ko‘ramiz. Qatar chempionatida "Al Sadd"ga qarshi raqiblar himoyaviy o‘yin ko‘rsatishga harakat qiladi. "Nasaf" haqida unday demagan bo‘lardim. Shu boisdan bu savolga ertaga javob berishim mumkin, biroq hozir emas.

- Birinchi o‘yinda "Al Sadd"ga "Sharja" bilan o‘yinda g‘alaba uchun nima yetishmadi?

- O‘shanda g‘alaba qozonishimiz shart edi. Chunki o‘sha o‘yinda biz to‘laqonli ustunlik qildik, ko‘plab vaziyatlarga ega bo‘ldik, penaltini ura olmadik. Shunchaki omad kelmadi. O‘sha bahsdagi durang natija - adolatsizdek bo‘ldi. Guruhdagi raqiblarga keladigan bo‘lsak, OCHLda kuchsiz jamoaning o‘zi bo‘lmaydi. Har bir jamoa o‘z mamlakatida yetarlicha obro‘ga ega. Ya’ni, OCHLning darajasi umuman boshqacha.

- "Nasaf"ning qaysi futbolchisini alohida maqtab o‘tishingiz mumkin. O‘zbek futboliga qanday baho berasiz?

- "Nasaf"ning biror futbolchisini alohida ta’kidlamagan bo‘lardim. Chunki ular jamoaviy o‘yin namoyish qilishadi. Tarkibdagi har bir futbolchining kuchli tomonlari ko‘p. Shu sababli ulardan kimnidir ajratib ko‘rsatish noto‘g‘ri. O‘zbek futboli haqida gapiradigan bo‘lsam, mamlakatdagi futbol so‘nggi yililarda anchagina o‘sdi deya olaman. Turli yoshdagi termalar o‘zlarini ko‘rsatishmoqda, ularda yaxshi murabbiylar ishlashmoqda. Jamoalarda kelajagi porloq yosh futbolchilar bor. O‘zbekiston termalari kelajakda katta musobaqalarda ishtirok etishi kerak.

- Sizlarga Qarshi shahri qanchalik taassurot qoldirdi. Shaharning iqlimi Sizlarga ta’sir ko‘rsatmaydimi?

- Ob-havo juda ajoyib, menga ma’qul keldi. Biroq shahar haqida baho berish uchun bizda yetarlicha vaqt bo‘lmadi. Chunki kechagina bu yerga yetib keldik. Lekin O‘zbekiston haqida tasavvurga egaman. Bu yer kichik davlatdek ko‘rinishi mumkin, biroq odamlari juda oliyjanob. Qarshi shahrida hozircha tasavvurim yo‘q, biroq O‘zbekiston haqida yaxshi tasavvurga egaman.

Paulo Otavio: - Kecha tunda yetib keldik. Shahar aylanishga vaqtimiz bo‘lmadi. Bor e’tiborimizni o‘yinga qaratganmiz. O‘zbekistonga ilk marta kelishim. Kelishimdan oldin bu yerlar haqida tasavvurga ega bo‘ldim, internet orqali chiroyli rasmlarni ko‘rdim. Albatta, qayergadir borishdan oldin internet orqali u yerlarni bilib olish kerak bo‘ladi.