"Mumbay Siti" bosh murabbiyi: "Al Hilol" - "Navbahor" o‘yinini kuzatdik. Natijadan hayron qoldim"
Bugun Namangan shahar, Davlatobod tumanidagi “Navbahor” uy uchrashuvlarini o‘tkazadigan “Markaziy” stadioni anjumanlar zalida Osiyo Chempionlar Ligasi guruh bosqichi, 2-turidan o‘rin olgan “Navbahor” – “Mumbay Siti” uchrashuvidan oldingi matbuot anjumanining ikkinchi qismida “Mumbay Siti” jamoasi bosh murabbiyi Desmond Bukingem va mehmonlarning tajribali yarim himoyachisi Rostin Griffits ishtirok etishdi.
Quyida e’tiboringizga Desmond Bukingemning fikrlarini havola etyapmiz.
Des Bukingem: "Tungi soat 03:30da Namanganga qo‘ndik va bizni tantanali kutib olishdi, buning uchun rahmat aytaman. Yaxshi dam oldik va bahsga tayyorgarlik ko‘rmoqdamiz.
Guruhimizda kuchli jamoalar bor va "Navbahor" "Al Hilol" bilan durang qayd etdi, shu sababli ularni ham kuchli deyish xato emas. Bu jamoaga qarshi bahs yuqori darajada o‘tadi deb o‘ylayman.
"Navbahor"da qaysi futbolchini alohida ko‘rsata olasiz? Ularni alohida ajratib ko‘rsata olmayman, jamoada kuchli futbolchilar yig‘ilgan. "Al Hilol" - "Navbahor" uchrashuvini kuzatdik. Natijadan hayron qoldim.
"Navbahor" haqida qanday ma’lumotga egaman? Ushbu klubda jismonan baquvvat yigitlar yig‘ilgan, jamoa murabbiyi ham juda iqtidorli. U katta tajribaga ega.
"Navbahor" va "Mumbay Siti" o‘rtasida katta farq bor, jamoa bungacha xalqaro turnirda ishtirok etgan, biz esa bu turnirda yangimiz. Endigina ikkinchi marta musobaqada qatnashyapmiz. Har bir o‘yin bizga ulkan tajriba beradi.
OCHLda har bir xato qimmatga tushishi mumkin, ammo bu xatolar jamoaga tajriba to‘plashga yordam beradi. Muxlislar bizga ishonishda, jamoani qo‘llab-quvvatlashda davom etishsa, ularga yaxshi o‘yinlar namoyish etamiz.
"Mumbay Siti" Mumbaydagi mehmonxonalarga o‘xshash ekan. Parvozdan charchagandik, shuning uchun iloji boricha yaxshi dam olib, tiklanishga e’tibor qaratdik".
“Zamin” yangiliklarini “Youtube”da kuzatib boring
