Rossiya futbol jamoatchiligi vakillari TsSKAdagi faoliyatini muvaffaqiyatli boshlagan Abbosbek Fayzullaevning o‘yinlariga baho bermoqda.
20 yoshli futbolchimiz jamoasining sentyabr va oktyabr oylaridagi eng yaxshi futbolchisi bo‘ldi. Avval Rossiya Premer-ligasida o‘ynagan futbolchilarimiz bunday natija qayd etmaganini ta’kidlash lozim.
Sports.uz portali rossiyalik futbol mutaxassislarining Abbosbek Fayzullaev haqidagi fikr-mulohazalarini o‘zbekistonlik muxlislar e’tiboriga havola qiladi.
Igor Semshov, “Chayka” jamoasi bosh murabbiyi:
Fayzullaev o‘zini yaxshi tomondan ko‘rsatmoqda, murabbiy unga ishonch bildiryapti. Abbosbek maydondaligida har bir vaziyatdan maksimum foyda chiqarishga urinyapti. U yosh va kelajagi bor o‘yinchi. Eng muhimi, uni yanada o‘sish maqsadi bor. Fayzullaev TsSKAni kuchaytirdi.
Marat Xinchagov, Ultimate Sports agentligi rahbari, futbol agenti:
Transfer bozorida favqulodda muvaffaqiyatli tanlovlar ham bo‘lib turishi, odamni quvontiradi. Masalan, Abbosbek Fayzullaev. TsSKA selektsiya bo‘limi juda zo‘r transferni amalga oshirgan bo‘lib chiqdi. Avvaliga bu transfer ko‘pchilikni ikkilantirgandi.
Biz ham bu futbolchini kuzatib kelayotgan edik va endi Fayullaev mahoratini Rossiyada oshirishidan xursandmiz.
Oleg Fomenko, TsSKA murabbiyi:
Abbosbek Fayzullaev juda yaxshi futbolchi. U juda katta hajmdagi ishlarni bajarmoqda va jamoaga ko‘p foyda keltiryapti. Fayzullaev ajoyib yigit, u futbolchi sifatida tez o‘syapti. Xudo bergan iqtidori bor va u buni rivojlantiryapti.
Valeriy Kechinov, “Paxtakor” va “Spartak” sobiq futbolchisi:
Menga Abbosbek Fayzullaev kabi engil, tezkor, texnikasi kuchli va aqlli futbolchilar juda yoqadi.
Vladimir Ponomarev, TsSKAning sobiq o‘yinchisi:
TsSKAda paydo bo‘lgan Fayzullaev o‘yindan o‘yinga o‘sib boryapti va har bir uchrashuvda raqib darvozasi oldida xavfli vaziyatlarni yaratmoqda. O‘ylashimcha, kelasi yozda Abbosbek Evropaga ketmaydi. Chunki u hali yanada ko‘proq tajriba to‘plashi va o‘z ustida ishlashda davom ettirishi kerak. U hali TsSKAga ko‘p foyda keltirishiga umid qilaman.
Igor Korneev, TsSKAning sobiq o‘yinchisi:
Fayzullaev jismonan baquvvat bo‘lmasa-da, murakkab vaziyatlardan tezkor harakatlari va engil driblinglari bilan chiqib keta oladi.
Yuriy Belous, futbol eksperti:
Fayzullaev uchrashuvlarning eng yaxshi o‘yinchisi sifatida e’tirof etilayotganidan umuman hayratga tushmadim. Abbos maydondagi eng muhim figuralardan biriga aylangan. U aqlli, tezkor, chaqqon o‘yinchi va katta hajmdagi ishlarni bajarmoqda. TsSKAga tez singib ketganidan xursandman.
“Zamin” yangiliklarini “Instagram”da kuzatib boring
