Taniqli futbol mutaxassisi Andrey Kanchelskis Yevropaning eng kuchli ligalarida porlagan yulduzlardan hisoblanadi.
Kanchelskis sobiq ittifoq parchalanganidan keyin Angliyaga yo‘l olgan ilk futbolchilardan biridir. Buyuk Britaniya maydonlarida Angliyaning “Manchester Yunayted”, “Everton”, “Manchester Siti”, “Sautgempton” va Shotlandiyaning “Reynjers” jamoalari sharafini himoya qilgan Andrey ikki martadan ushbu mamlakatlar chempionligiga erishgan.
Yaqinda Andrey Kanchelskis Angliya premer-ligasi tarixidagi eng zo‘r yuz nafar o‘yinchi reytingiga kiritildi.
Taqdir taqozosi bilan Andrey Kanchelskis murabbiy sifatida ikki marta Namanganning “Navbahor” jamoasini boshqardi. Shu bois, u o‘zbek futboli, iqtidorli o‘yinchilarimiz haqida yetarlicha ma’lumotga ega.
Tajribali mutaxassis Rossiya futbolini yoritayotgan jurnalistlarga Premer-ligada o‘z iqtidorini namoyon qilayotgan Abbosbek Fayzullayev haqida gapirdi. Kanchelskis “Paxtakor”da tarbiyalangan hujumkor futbolchining iste’dodini ancha oldin payqaganini bildirdi.
- Men Abbosbek Fayzullayevni Moskvaning “Lokomotiv” jamoasiga tavsiya qilgandim, lekin ular bunga e’tibor qaratishmadi. Nega bunday qilishgani g‘alati. Axir bu ularning seleksiya xizmati bajarishi kerak bo‘lgan ish edi-ku. Bu klub seleksionerlari ishlabyaptimi, yo‘qmi, bilmayman.
Abbos SSKAga ko‘chib o‘tganidan men xursand bo‘ldim va u yangi jamoasida yaxshi o‘ynayapti. Xudo unga sog‘liq va barqarorlik bersin, mana shu ikki xislat mahoratdan darak beradi.
Fayzullayev “Paxtakor”dan to‘g‘ri Yevropaga ketishi mumkinmidi? Men u SSKA jamoasiga o‘tib to‘g‘ri qildi, deb hisoblayman. Hozir u o‘zini ko‘rsata oldi.
Agar Fayzullayev hozirgi o‘yinini keyinchalik ham ko‘rsatsa, kuchli chempionatlardan biriga o‘tib ketishi uchun ko‘p imkoniyatlar bo‘ladi, - dedi Andrey Kanchelskis.
Abbosbek Fayzullayev O‘zbekiston futbolida so‘nggi yillarda tarbiyalangan eng iqtidorli futbolchilardan biri hisoblanadi. “Paxtakor” akademiyasidan yetishib chiqqan o‘yinchi bir necha pozitsiyada o‘ynay oladi.
Legionerimiz SSKAga ko‘chib o‘tganidan keyin jami 13 ta uchrashuvda maydonga tushib, bitta gol va oltita assist qayd etdi. Ayni paytda u Premer-liganing eng kuchli futbolchilari qatorida e’tirof etilmoqda. “Armiyachi”larning har bir uchrashuvdagi hujumlari aynan Abbosbek tomonidan tashkil etiladi.
20 yoshli futbolchimiz yaqinda intervyu berib, “Barselona”ga muxlislik qilishi, orzusi “Kamp Nou”da o‘ynash ekanini aytgan edi. Qolaversa, Fayzullayev sakkiz karra “Oltin to‘p” sohibi, jahon chempioni Lionel Messining ashaddiy muxlisi hisoblanadi.
“Zamin” yangiliklarini “Facebook”da kuzatib boring
