«Manchester Yunayted» hujumchisi Brayan Mbeumo so'nggi o'yinlardagi samaradorligi pasayib ketgani sababli jiddiy tanqidlar markazida qoldi. Mavsum boshida 71 million funt sterling evaziga transfer qilingan futbolchi dastlabki oylarda ajoyib o'yin ko'rsatgan edi. Biroq hozirda kamerunlik forvard ketma-ket sakkizta uchrashuvdan buyon raqiblar darvozasini ishg'ol qila olmayapti. U so'nggi bor 7 fevral kuni «Tottenxem»ga qarshi bahsda gol urgan edi. Bu haqda Goal.com xabar beradi.
Mbeumo joriy mavsumda Premyer-ligada 9 ta gol bilan jamoasining eng yaxshi to'purari bo'lib turibdi, ammo uning umumiy hissasi sezilarli darajada kamaygan. Ikki oydan beri na gol, na assist qayd etgan hujumchi dushanba kuni o'zining sobiq jamoasi «Brentford»ga qarshi maydonga tushishga tayyorlanmoqda. Muxlislar va ekspertlar bosh murabbiy Maykl Kerrikdan uni asosiy tarkibdan tushirib qoldirishni talab qilmoqda.
Futbolchining formasiga Ruben Amorimning iste'fosi va Afrika Millatlar Kubogiga ketgani salbiy ta'sir ko'rsatgan bo'lishi mumkin. Amorim qo'l ostida u hujumkor yarim himoyachi sifatida porlagan bo'lsa, Kerrik tizimida markaziy hujumchi vazifasini bajarmoqda. Ayni paytda jamoaning boshqa bir yangi a'zosi Benjamin Shesko gollar soni bo'yicha Mbeumoga yetib oldi. Agar kamerunlik futbolchi mavsum yakuniga qadar o'z o'yinini topa olmasa, u o'tgan yili muvaffaqiyatsizlikka uchragan Rasmus Xojlundning yo'lidan ketishi xavfi mavjud.
“Zamin”ni Telegramʻda oʻqing!
