Sosa Sola Superliganing 26-turi doirasida OKMK maydonidagi durangdan keyin "Nasaf" bosh murabbiyi Ro‘ziqul Berdiyev fikrlarini bildirdi.
- O‘yin jangovar o‘tdi, maydonda haqiqiy jang bo‘ldi. Ikkala jamoa ham g‘alaba uchun maydonga tushgani ko‘rinib turgandi. OKMK ham, biz ham g‘alaba uchun loyiq o‘yin ko‘rsatdik. Bizda ham ko‘plab vaziyatlar bo‘ldi. Bugun ikkala o‘yin ham durang bilan yakunlandi va biz uchun omadli bo‘ldi. O‘ylaymanki, "Nasaf" kumush medallarga loyiq edi. Qiyin bo‘lishini bilsak-da, bugun biz natija uchun o‘ynadik. Bugun jamoalarda yengillik ko‘rinmagan bo‘lsa-da, jangovar o‘yinni ko‘rsatib bera olishdi.
- "Nasaf" bugun to‘liq asosiy tarkibini o‘ynatmadi. Siz ko‘plab futbolchilarni OCHL o‘yini uchun olib qo‘ydingizmi yoki OCHL pley-offi uchun medallarni qurbon qilishga tayyormidingiz?
- Ko‘p o‘yin o‘tkazdik, shu sababli doimo keyingi o‘yinni ham hisobga olamiz. Tarkibda doimo rotatsiya bo‘lib turadi, asosan markaziy himoyada va hujum chizig‘ida futbolchilarga dam berib turamiz. Chunki ushbu pozitsiyada bizda rotatsiya uchun imkoniyatlarimiz bor. Oldingi o‘yinda boshqalar o‘ynagandi, shu sababli bugungi uchrashuvga boshqa futbolchilarni jalb qildik. Bilasiz, 3 kundan keyin og‘ir o‘yin o‘tkazamiz va buni ham o‘ylagandik.
- Oldingi matbuot anjumanlaridan birida Siz ushbu mavsum "Nasaf" uchun omadli o‘tayotganini aytgandingiz. Shu fikringizda qolasizmi? "Nasaf" Sizning qo‘l ostingizdagi eng yaxshi mavsumini o‘tkazdimi?
- Albatta. Vitse-chempionlik va ikkita kubokni qo‘lga kiritish - biz uchun tarixda bo‘lmagan holat. Buni takrorlash ham juda qiyin. Shu sababli hech shubhalanmasdan ushbu mavsum "Nasaf" uchun eng omadlisi bo‘ldi deya olaman.
- O‘tgan mavsum "Nasaf" so‘nggi turda chempionlikni boy bergandi. Ushbu mavsumda "Nasaf"ga chempionlik uchun nima yetishmadi deb o‘ylaysiz?
- Bunga bir qancha sabablar bor. Ayniqsa, kerakli futbolchilarning jamoadan ketgani, legionerlar transferi omadsiz bo‘lganini keltirish mumkin. Barqarorlik, mahorat yetishmadi. Barchasini ko‘rib chiqamiz.
- "Nasaf"ga ushbu mavsumda 5 ballik tizimda necha baho qo‘yasiz?
- Besh baho qo‘yaman.
“Zamin” yangiliklarini “Odnoklassniki”da kuzatib boring
