Kelasi yoz Eldor Shomurodov faoliyatini qayerda davom ettirishini hal qilishi lozim bo‘ladi. Ayni paytda legionerimizning transfer huquqi “Roma”ga tegishli va o‘rtada 2026 yilning yarmigacha davom etadigan shartnoma bor.
“Kalyari” 28 yoshli forvardni keyinchalik 9 million yevroga to‘liq transfer qilish huquqi bilan bir mavsumga ijaraga olgan. Biroq, buning uchun sardiniyaliklar yuqori diviziondagi joyini saqlab qolishi va Eldor Shomurodov “Salernitana” bilan bo‘lgan uchrashuvdagidek samarali o‘yin ko‘rsatishi lozim.
Italiya futbolini yoritib kelayotgan nufuzli manbalardan biri – calciomercato.com sayti eksperti Antonio Sinus legionerimiz atrofidagi vaziyatni tahlil qilib berdi.
- “Salernitana”ga qarshi bahsning ikkinchi bo‘limida tashabbusni o‘z zimmasiga olib, ikkita gol bilan jamoasining muhim g‘alabasini ta’minlagan Eldor Shomurodov qishda jamoani tark etishga harakat qilganiga hozir ishonish qiyin. O‘zbek futbolchisi o‘yin amaliyotisiz qolib ketayotgani tufayli narsalarini yig‘ishtirgandi.
O‘shanda Klaudio Raneri hujumdagi muammolarni inobatga olgan holda Shomurodovga ishonch bildirib, uni hech bo‘lmaganda mavsum oxiriga qadar jamoada olib qolishni ma’qul ko‘rdi.
Mana so‘nggi o‘yinda o‘zbek hujumchisi haqiqiy darajasini namoyish qildi. U gol urishdan tashqari, yarim himoyadagilarga katta yordam berdi, har bir to‘p uchun kurashdi.
Eldor Shomurodovning transfer huquqi “Roma”ga tegishli, biroq uning kelajagi aniq emas va hamon mavhumligicha qolmoqda. Agar “Kalyari” A Seriyadagi joyini saqlab qolsa va bunda asosiy qahramon rolini Shomurodov o‘ynasa, bu transferning amalga oshirilishi muqarrar. Aks holda u ortga qaytariladi.
Hozir sardiniyaliklar hujum chizig‘ida muammo yetarli. Pavoletti, Petanya va Luvumbo safdan chiqqan, Lapadulaga samaradorlik yetishmayapti. Bu holat Eldorga qo‘l kelishi mumkin. Shomurodov birinchi urinishdayoq jamoaga yordam berishga tayyorligini namoyish qildi.
Eldor kelasi mavsum “Kalyari”ning asosiy hujum quroliga aylanishi mumkin. Chunki Leonardo Pavoletti ko‘p jarohat olmoqda va kelajakda unga umid bog‘lash xato bo‘ladi. Janluka Lapadulaning samardorligi tushib ketgan va jismoniy tayyorgarlik bo‘yicha muammolar borligi ko‘zga tashlanyapti. Zito Luvumboni “Napoli” va bir necha Angliya klublari o‘z safiga qo‘shib olishga harakat qilyapti.
Bu holatda kelasi mavsum uchun asosiy hujumchi maqomiga ikki da’vogar Andrea Petanya va Eldor Shomurodov qolmoqda. “Monsa”ning sobiq futbolchisi ko‘p jarohat olayotgani Shomurodovni muhim figuraga aylantirmoqda.
Klaudio Raneri oldindagi uchrashuvlarda asosiy hujumchi vazifasini yana Lapadulaga topshirsa kerak, biroq har qanday holatda ham Eldor Shomurodov o‘yinning ikkinchi yarmida maydonga tashlanadi, - dedi futbol eksperti Antonio Sinus.
Eldor Shomurodovning kelasi mavsumni qaysi jamoada davom ettirishi ko‘p jihatdan mavsumning qolgan qismini qay darajada o‘tkazishiga bog‘liq. Qolaversa, Eldorni “Roma”da o‘ynashiga imkon bermagan Joze Mourino ham Rimni tark etib bo‘lgan. Demak, kelasi yozda transfer oynasi ochilishi bilan Eldor Shomurodov atrofidagi vaziyatni kuzatib borishga to‘g‘ri keladi. “Zamin” yangiliklarini “Instagram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Ruslar Abrams tanklarining zaif tomonini topishdi
Piyoda yurish va bog‘dorchilik bilan shug‘ullanish depressiyaga chalinishni 23 foizga kamaytiradi
Xitoy AQSHni «qizil chiziqlar»ni kesib o‘tishdan ogohlantirdi va «dushman emas, hamkor» bo‘lishga chaqirdi
Zoir Mirzayev “Telefonsiz maktab”ga 300 mln so‘m mukofot berdi
Germaniyada ishlash istagida bo‘lgan o‘zbekistonlik mutaxassislar uchun nemis tili o‘rgatiladi
Global Janub kimniki?
AQSHning G‘azodagi siyosatidan norozi Davlat departamenti rasmiysi iste’foga chiqdi
Lukashenko G‘arbga tahdid bilan chiqdi
