Mashhur murabbiy o‘zbek futbolini Qozog‘istonnikidan ustun qo‘ydi

Taniqli futbol mutaxassisi Andrey Kanchelskis rossiyalik Aleksandr Kerjakovning “Qayrat” jamoasiga bosh murabbiy etib tayinlanganiga munosabat bildirdi.

- Sobiq ittifoq hududida qozog‘istonliklar o‘z mintaqasida futbol darajasi bo‘yicha O‘zbekistondan keyin ikkinchi o‘rinda, ulardan keyin Tojikiston joylashgan va qolgani shu tarzda davom etadi.

Men Kerjakovga muvaffaqiyat tilashim mumkin, ijobiy natida qayd etsin. Qandaydir maslahatlarni alohida uchrashganda faqat o‘ziga aytishim mumkin.

Kerjakovni murabbiy sifatida qanday baholayman?

Biz hali uchrashmaganmiz va shu bois, baholay olmayman. Uning ish tizimi va mashg‘ulotlar jarayoni qanday tuzilganini bilmayman. Keling, buyog‘iga nima bo‘lishini kuzatamiz.

“Qayrat” o‘z nomiga ega badavlat klub va uning o‘ziga yarasha an’analari bor. Faqat vaqt o‘tishi bilangina qandaydir xulosalarni chiqarish imkoni vujudga keladi. Hozir jo‘yali gap aytib bo‘lmaydi, - dedi Andrey Kanchelskis.

O‘z davrida “Manchester Yunayted” yulduzlaridan bo‘lgan Andrey Kanchelskis O‘zbekiston va Qozog‘iston futbolini solishtirayotgani bejiz emas. Bu mutaxassis har ikki mamlakat futboli bilan yaqindan tanish.

Rossiyalik mutaxassis yaqin o‘tmishda “Navbahor” bosh murabbiy bo‘lib faoliyat yuritgan. O‘tgan yili esa, Qozog‘istonning “Tobol” jamoasi bosh direktori lavozimida ishladi.

Aleksandr Kerjakov 2023 yilning iyun-noyabr oynlarida Serbiyaning “Spartak” (Subotitsa) jamoasida bosh murabbiylik qilgandi. Undan avval Rossiyaning “Nijniy Novgorod”, “Tom”, Kiprning “Karmiotisse” jamoalarida bosh murabbiy sifatida ish yuritgan.

Joriy mavsumda “Qayrat” safida o‘zbekistonlik futbolchi Ibrohimxalil Yo‘ldoshev to‘p tepmoqda. Qizig‘i shundaki, legionerimiz ilgari “Nijniy Novgorod” jamoasida aynan Aleksandr Kerjakov qo‘l ostida o‘ynagan.

Aleksandr Kerjakov “Nijniy Novgorod”ni boshqargan davrda Yo‘ldoshev jamoaning asosiy o‘yinchilaridan biri bo‘lgan. “Zamin” yangiliklarini “Instagram”da kuzatib boring