Isroil Madrimov toʻliq davom etgan jangda Terens Kroufordga magʻlub boʻldi

Oʻzbekiston vaqti bilan 4 avgust tongida AQShning Los-Anjeles shahrida katta professional boks oqshomi tashkil etildi.

Ushbu oqshomning markaziy jangida Isroil Madrimov hamda amerikalik Terens Krouford birinchi oʻrta vazn toifasida WBA kamari uchun toʻqnash keldi.

Dastlabki raundlarda bokschilar bir-birini oʻrganishga harakat qilgan boʻlsa, keyingi raundlarda ikkalasi ham bir qancha xavfli zarbalarni almashtirishga muvaffaq boʻldi. Soʻnggi raundlarda oʻzbekistonlik bokschi bir qancha xavfli zarbalarni yoʻlladi. 11-raundda esa Krouford faollikni oshirdi.

Yakunda hakamlar ochkolar evaziga (116-112, 115-113, 115-113) Terens Kroufordning gʻalabasini e'lon qildi.

Terens Krouford bunga qadar professional ringda oʻtkazgan 40 ta jangining barchasida gʻalaba qozongan. Gʻalabalarining 31 tasiga nokaut orqali erishgan edi.

Madrimov esa oldingi jangida 8 mart oqshomida Saudiya Arabistonining Ar-Riyod shahrida rossiyalik Magomed Kurbanovni 5-raundda nokautga uchratib, WBA kamarini qoʻlga kiritgandi. “Zamin” yangiliklarini “Telegram”da kuzatib boring