Supergol urib, sensatsiya ko‘targan Shomurodovning o‘yini qanday baholandi?

Daniele De Rossi boshchiligidagi “Roma” yangi mavsumda yuqori o‘rinlar va Yevropa Chempionlar ligasi yo‘llanmasini qo‘lga kiritishi kutilmoqda. Italiyalik mutaxassis o‘zidan oldin jamoani uch yilga yaqin boshqargan Joze Mourino uddalay olmagan ishni amalga oshirishi kerak.

O‘tgan mavsum yarmida jamoani qabul qilib olgan “Roma” afsonasi o‘yinda ijobiy o‘zgarishlar qilgani rost. Biroq yangi mavsumni poytaxtlik “bo‘rilar” uchun muvaffaqiyatli boshlandi, deb bo‘lmaydi.

Birinchi uchrashuvda “Kalyari” maydonidan golsiz durang bilan qaytgan “Roma” o‘z muxlislari ko‘z o‘ngidagi ikkinchi bahsda “Empoli”dan ikkita to‘p o‘tkazib yubordi.

Artyom Dovbik, Paulo Dibala va Matias Suledan tarkib topgan hujum uchligi ish bermagach, Daliele de Rossi 77-daqiqada o‘yinga Eldor Shomurodovni qo‘shdi. Suleni o‘rnini egallagan legionerimiz “Roma”da qolishga va ungu imkon berishlariga loyiq ekanini ko‘rsatdi.

Avvaliga 80-daqiqada supergol urib hisobdagi farqni qisqartirgan Shomurodov jamoasiga durang taqdim etishga juda yaqin kelgandi. Biroq ozgina vaqt yetishmadi.

Italiya futbolini yoritib kelayotgan tuttomercatoweb.com sayti ekspertlari uchrashuvdan keyin “Roma” futbolchilarining harakatlarini quyidagicha baholadi.

Mile Svilar 6,5:
90 daqiqada davomida bu darvozabon bir necha seyvlarni amalga oshirib, raqibning xavfli zarbalarini bartaraf etdi. Lekin uning harakatlari ijobiy natijani qo‘lga kiritishga yetarli bo‘lmadi.

Zeki Chelik 5,5:
Turk futbolchining o‘zini hafsalani pir qildi. Birinchi bo‘limda raqib o‘yinchisi Juzeppe Petssellaga qarshilik ko‘rsata olmagach, tanaffusda o‘rnini Nikolo Zalevskiga bo‘shatib berdi.

Nikolo Zalevski 6:
Bu futbolchi jamoadoshlariga nisbatan ko‘proq tashabbus ko‘rsatdi, lekin uning harakatlariga o‘zga bo‘lgan ishonch va qat’iyat yetishmadi.

Janluka Manchini 6,5:
Himoyadagi vazifalarini bajarishdan tashqari, hujumchilarga yordam berish uchun oldinga o‘tib o‘ynashiga to‘g‘ri keldi.

Evan Ndika 6:
Jamoadoshlariga nisbatan samarasiz o‘ynadi.

Anxelino 5,5:
Chap qanotni kutilgan darajada harakatga keltira olmadi. Bu futbolchi bahs davomida jamoa o‘yinini kuchaytira olgani yo‘q.

Brayan Kristante 6:
Uchrashuvni kutilgan darajada o‘tkazmagan bo‘lsa-da, past bahoga ham loyiq emas.

Tommazo Baldansi 6,5:
63-daqiqada Kristante o‘rniga maydonga tushgan futbolchi o‘yinga yaxshi qo‘shildi va Eldor Shomurodovga golli pas uzatdi.

Leandro Paredes 4,5:
O‘z darajasida juda past o‘ynadi. Penaltiga sababchi bo‘lib qoldi. O‘rnini 63-daqiqala Enso Le Fega bo‘shatib berdi.

Enso Le Fe 6:
Hujumni kuchaytirish uchun juda qiziqarli yechimlar taklif qila oldi.

Lorenso Pellegrini 6:
O‘yinni katta ishtiyoq bilan boshlagan futbolchi keyinchalik so‘nib qoldi.

Paulo Dibala 6:
Jamoaning eng ishongan o‘yinchisi vaziyatni o‘nglash uchun bor kuchi bilan harakat qildi. Biroq bu bahsda omadi chopmadi.

Matias Sule 5,5:
Hamyurti Dibalaga nisbatan bo‘shroq o‘ynadi. U hali Daniele De Rossi uslubiga moslashib olishi kerak. 77-daqiqada o‘rnini Eldor Shomurodovga bo‘shatib berdi.

ELDOR SHOMURODOV 7:
Ajoyib o‘yin, supergol va jamoani mag‘lubiyatdan qutqarish umidini berdi. Kim biladi, balki unga “Roma”da qolishi va asosiy tarkibga kirishi uchun yana imkoniyat berish kerakdir?!

Artyom Dovbik 5:
Ispaniyada hammani hayratgan solgan o‘yinchi o‘z darajasidan ancha uzoqda ekan. “Empoli” himoyachilariga qarshi hech narsa qila olmadi.

Daniele De Rossi 5:
Mavsumni juda og‘ir boshladi. Birinchi bo‘limda shogirdlari yomon o‘ynadi. O‘yinchi almashtirishda kech qoldi. O‘z ustida hali ko‘p ishlashi kerak.

“Roma” futbolchilarini uchinchi turda juda murakkab o‘yin kutmoqda. “Bo‘rilar” keyingi uchrashuvini 1 sentyabr kuni Turinda “Yuventus”ga qarshi o‘tkazadi. “Zamin” yangiliklarini “Twitter”da kuzatib boring