“Nyukasl”ning Abduqodir Husanov boʻyicha rejasi ayon boʻldi

“Lans”da porlayotgan Abduqodir Husanov uchun kurashayotgan jamoalar qatorida “Nyukasl Yunayted” ham bor.

Yaqin oʻtmishda Angliya Premer-ligasining oʻrtamiyona va hatto autsayder jamoalaridan biriga aylanib qolgan ”Nyukasl” Saudiya Arabistoni investitsiya jamgʻarmasi qaramogʻiga oʻtganidan keyin yuqori oʻrinlar va Evrokuboklar yoʻllanmalari uchun kurashadigan klublar safiga qoʻshildi.

Katta maqsadlarga erishish uchun klub muntazam ravishda tarkibini kuchaytirib borishi talab etiladi. Ana shuning uchun ham jamoa bosh murabbiyi Eddi Xau yanvar oyi davomida yangi ijrochilarni olib kelishga qaror qilgan. “Qargʻalar” moʻljalida turgan asosiy nishonlardan biri Abduqodir Husanovdir.

Nufuzli manbalarning “Nyukasl”ni oʻzbek futbolchisi borasidagi transfer siyosati haqidagi pozitsiyalarini oʻzbekistonlik futbol ishqibozlari e'tiboriga havola etamiz.

GIVEMESPORT.COM:
- Abduqodir Husanovning joriy mavsumda “Lans”da koʻrsatayotgan oʻyini uning obroʻsini oshirib bormoqda. U markaziy himoyachi sifatida kuchli, tezkor va xotirjam oʻyini bilan koʻplab klublar e'tiboriga tushdi. “Lans”ning mavsumdagi “quruq” oʻtkazgan uchrashuvlari asosan Husanovning mehnatlari samarasidir. Oʻzbek futbolchisi hali yosh va agar shu darajada oʻynashda davom etsa, tez orada uni katta klublarda koʻramiz.

Bir necha klublar qatorida “Nyukasl” ham uni kuzatib bormoqda. Yaqinda “qargʻalar” bosh murabbiyi Eddi Xau yanvar oyida himoya chizigʻini kuchaytirshni rejalashtirayotganini aytib oʻtgandi. Frantsiyalik taniqli jurnalist Sebastyan Denisning ma'lumotiga koʻra, “Nyukasl” Husanov nomzodiga “juda, juda qiziqyapti”.

“Lans” oʻz yulduziga 25-30 million evrodan kam boʻlmagan mablagʻ toʻlaydigan jamoa topish vazifasini mashhur futbol agenti Jorje Mendeshga yuklagan. Bu agent oʻyinchini “Nyukasl”dan tashqari “Manchester Siti”, “Tottenxem”, “Lester” kabi Angliya Premer-ligasi jamoalariga joylash imkoniyatini oʻrganib chiqmoqda.

Abduqodir Husanovning himoyachi sifatidagi xususiyatlari Premer-ligaga mos tushadi. Bu futbolchi baquvvat va tezkor, oʻyinni yaxshi oʻqiy oladi, standart vaziyatlarda raqib darvozasiga xavf sola oladi. 2023 yilning mayidan beri Oʻzbekiston milliy terma jamoasiga jalb qilinmoqda. Husanov terma jamoada 18 ta uchrashuvda ishtirok etgani uning xalqaro miqyosdagi faoliyatidan kelib chiqib, yuqori saviyadagi futbol ligalarida oʻynay olishidan dalolat beradi.

SPORTS.YAHOO.COM:
- “Nyukasl” oʻtgan yoz “Kristal Pelas” himoyachisi Mark Gexining transferini uddalay olmagan edi. Shundan keyin jamoa bosh murabbiyi Eddi Xau yangi himoyachi masalasini qishki transferlar oynasiga qoldirdi.

Oʻrganishlar natijasida “Lans”da kashfiyotga aylangan Abduqodir Husanov nomzodi ma'qullandi.

“Nyukasl”da etakchi himoyachilar – Sven Botman va Jamol Lasselsning ogʻir jarohat olib, mavsumni oʻtkazib yuborayotgani Eddi Xauni murakkab vaziyatga solib qoʻydi. Shu bilan birga klubda qishki transferlar davrida jamoa himoyasini kuchaytirish zaruratini uygʻotdi.

Bundan tashqari, 33 yoshli himoyachi Fabian Sherning shartnomasi yozda tugaydi. Klub shvetsiyalik futbolchi bilan hamkorlikni uzaytirmoqchi emas, aksincha, uning oʻrniga yosh va uzoq yillar davomida himoyadagi muammolarni yopa oladigan oʻyinchini taklif etishga qaror qilgan. Bu himoyachi aynan Abduqodir Husanov boʻlishi kutilmoqda.

Darhaqiqat, bundan buyon Abduqodir Husanov transferi uchun borgan sari kuchayib boradi. “Lans”ning moliyaviy ahvoli etakchi oʻyinchilarini, xususan, oʻzbek legionerini uzoq vaqt tarkibda saqlab qolish uchun etarli emas.

Demak, 20 yoshli himoyachimiz kelasi mavsumni boshqa klubda, hatto Frantsiyadan tashqarida davom ettirishi ehtimoli yuqori. “Zamin” yangiliklarini “Telegram”da kuzatib boring