Abduqodir Husanov hammani hayratga solyapti...

Frantsiya futboli, xususan, “Lans” klubi faoliyatini yoritib kelayotgan lensois.com portali muxlisu mutaxassislar oʻrtasida soʻrovnomalar oʻtkazish orqali dekabr oyi va mavsumning birinchi yarmidagi eng yaxshi oʻyinchi nomini aniqladi.

- Dekabr oyining eng yaxshi futbolchisi tanlovida oʻzbek futbolchisi yana gʻalaba qozondi. Soʻrovnomada sizlar bergan ovoz Abduqodir Husanovning Adriyen Tomasson va Remi Labo Laskari ustidan gʻalabasini ta'minladi. Buning isboti sifatida soʻrovnoma natijalarini quyida keltiramiz, - deb yozdi lensois.com sayti.

Dekabr oyining eng yaxshi futbolchisini aniqlash uchun oʻtkazilgan soʻrovnoma natijalari:
- Abduqodir Husanov – 81,9%
- Adriyen Tomasson – 4,3%
- Remi Labo-Laskari – 3,62%
- Pshemislav Frankovski – 3,39%
- Mbala Nzola – 2,94%
- Boshqalar: 2 foizdan kam.

LENSOIS.COM sayti “Lans”ning mavsumni birinchi qismidagi eng yaxshi futbolchisini aniqlashni ham muxlislar ixtiyoriga topshirdi. Bu borada tashkil etilgan maxsus soʻrovnomaning natijalari ham Abduqodir Husanovning darajasini koʻrsatdi.

Aslida Abduqodirning dastlabki yarim yilning eng zoʻr oʻyinchisi boʻlgani hech kimni hayron qoldirgani yoʻq. Chunki oʻzbek legioneri olti oydan uchtasi – sentyabr, oktyabr va dekabr oylaridagi soʻrovnomalarda gʻolib boʻldi.

Eng e'tiborli jihati, Abduqodir Husanov mavsumning birinchi yarmidagi “Lans" klubining eng zoʻr futbolchisi tanlovida ham katta ustunlik bilan gʻalaba qozondi.

Natijalar quyidagicha boʻldi:
- Abduqodir Husanov: 84,39%
- Adriyen Tomasson: 8,92%
- Brays Samba: 4,83%
- Mbala Nzola: 1,86%.

“Lans” muxlislari legionerimiz haqida ijtimoiy tarmoqlarda oʻz fikr-mulohazalarini bildirmoqda.

PIMS62: Afsuski, “Lans” Abduqodir Husanovni uzoq ushlab qola olmaydi.

Black_Cats_62: Husanovni hech kimga oʻxshatmayman, uning oʻziga xos va oʻziga yarashgan oʻzgacha usuli bor. Abduqodir baquvvat himoyachi va borgan sari eng yaxshi sifatlarini namoyon qilib bormoqda.

Oʻzbek futbolchisi yosh boʻlishiga qaramay, moliyaviy omillar tufayli boshqa klubga transfer qilinadigan boʻlib turibdi.

RICOU62: Afsuski, “Lans”da Abduqodir Husanovning oʻrnini bosa oladigan birorta boshqa variant yoʻq. Boʻlmaydi ham.

JULIO59: Kevin Danso, Fakundo Medina va Abduqodir Husanov Evropa miqyosida ham eng yaxshi himoyachilar hisoblanadi. Qolgan oʻyinchilarimizning barchasi oʻrtamiyona futbolchilar sirasiga kiradi.

Husanov hammani hayratga solyapti. Abduqodirni hech boʻlmaganda yozgacha tarkibda ushlab qolish kerak. Uning transfer summasi mavsum oxirigacha yana koʻtariladi.

Agar “Lans”da yanada uzoqroq muddatga olib qolishni uddalay olishsa, bu jamoa muxlislarining quvonchiga sabab boʻladi.

SLY62: “Lans”ning 100 foiz muxlislari Husanovning jamoada qolishi tarafdori, bunga toʻliq aminman. Shuning uchun ham qishki transferlar davrida oʻzbek futbolchisining boshqa klubga oʻtib ketishi fanatlarga zarba boʻladi.

UF: Rostini aytganda, “Lans”da Abduqodirning raqobatchisi umuman yoʻq. Rafael Varan, Seko Fofana va Loi Opendani qoʻshib hisoblaganda ham, Husanov “Lans”ning oxirgi 15 yil ichidagi eng zoʻr futbolchisi.

Abduqodir Husanov joriy mavsumda Frantsiya chempionati, mamlakat kubogi va Evropa Ligasida jami 16 ta uchrashuvda ishtirok etib, himoyadagi vazifalarini bajarishdan tashqari, bitta assist ham qayd etdi. 20 yoshli futbolchi Transfermarkt portali tomonidan 12 million evroga baholanmoqda va bu koʻrsatkich boʻyicha Markaziy Osiyoning eng qimmatbaho oʻyinchisi hisoblanadi. “Zamin” yangiliklarini “Telegram”da kuzatib boring