Abduqodir Husanov oʻtgan sinovlarda koʻplar sinib ketadi!

Abduqodir Husanovning “Energetik-BGU” jamoasida professional futbolchilik faoliyatini boshlashgan davrda unga murabbiylik qilgan Pavel Rodnyonok oʻzbek himoyachisining “Manchester Siti”ga oʻtganiga munosabat bildirib, legionerimiz haqida qiziqarli ma'lumotlar berdi.

Husanovning salohiyati ulkan

Rostini aytsam, Husanovning “Manchester Siti”ga transferidan hayratlanganim yoʻq. Chunki uning salohiyati ulkan ekanini bilaman. Eng muhimi, uning hayot yoʻli davomida uni olgʻa boshlaydigan va rivojiga hissa qoʻshadigan insonlar roʻbaroʻ boʻlishidir.

Masalan, mening qoʻlimdan juda koʻp katta iqtidorga ega futbolchilar oʻtgan, lekin ular keyinchalik atrofidagilarning notoʻgʻri qarorlari tufayli yuksak saviyada oʻynab keta olmadi.

Husanovda unday boʻlmadi. Belarusda ham, Fransiyada ham kerakli joyga tushdi. Agar Abduqodir bizning jamoaga kelmasdan, “Dinamo Minsk” yoki boshqa klubga oʻtganida, hozir bunaqa himoyachi boʻlmas edi.

Husanov noyob sifatga ega

Abduqodir Husanov shiddatli oʻyinchi, uning oʻzi yakkakurashlarga kirib boradi, toʻpni olib qoʻyishga usta. Bu juda noyob qobiliyat. Keyingi paytda bizda toʻpni olib qoʻyishni unutib yuborishdi. Hamma oʻyinchilar oʻzini xuddi toʻp uchun kurashayotgandek koʻrsatsa, Abduqodir uni tortib oladi.

Bu tugʻma iste'dod. Biz uning bu iqtidorini mukammal darajaga olib chiqishga uringanmiz.

Hozir Husanov sobiq ittifoq hududida eng kuchli himoyachi ekaniga aminman. Bunga shubha qiladigan biror kim bormi?

Husanov kuniga toʻrt mahaldan shugʻullangan

Tasavvur qiling: yoshgina yigit keldi, oliy ligada oʻynab ketdi va Fransiya chempionatiga yoʻl oldi. Tabiiyki, katta oʻsishga erishgani uchun shunday boʻldi. Buning uchun qanday ulkan hajmdagi ishlarni qilganini siz tasavvur ham qila olmaysiz.

Tushunishingiz uchun aytaman: kuniga uning ikki mahal umumjamoaviy va ikki marta mustaqil mashgʻuloti boʻlardi. Qoʻshimchasiga individual mashgʻulot oʻtardi. Bundan tashqari, Husanovga har bir mashgʻulot va oʻyindan keyin turli vaziyatlar aks etgan lavhalar berilardi va Abduqodir ularni tahlil qilib chiqardi.

“Energetik-BGU”da ishga ana shunday munosabat boʻlgan. Kimki ana shu talablarga javob bersa, oʻynab keta oladi. Kuchi etmagan zaif oʻyinchilar tarkibdan tushib qolaveradi.

Ta'kidlash joizki, Abduqodir Husanov ilk professional shartnomasini 2022 yilning 17 martida “Energetik-BGU” bilan imzolagan. Bir yildan keyin legionerimiz Fransiyaning oʻsha paytdagi vitse-chempioni “Lans” safiga koʻchib oʻtdi.

Husanov “Lans” tarkibida Fransiya chempionati va kubogi, UYeFAning uchta xalqaro musobaqasi – Chempionlar ligasi, Evropa Ligasi va Konferentsiyalar ligasi ishtirokchisi hisoblanadi. “Zamin” yangiliklarini “Telegram”da kuzatib boring