Qozogʻistonlik futbol funktsioneri Abduqodir Husanov haqida fikr bildirdi

Futbol funktsioneri Ulugʻbek Asanbayev oʻzbekistonlik himoyachi Abduqodir Husanovning "Manchester Siti"ga oʻtishi borasida gapirdi.

"Shuni ta'kidlaymanki, men agent emasman va hech qachon agent boʻlmaganman. Mening vazifam futbolchini sport yoʻnalishida qoʻllab-quvvatlash va futbolchi uchun toʻgʻri murabbiy hamda jamoalarni tanlashdir. Futbolchining agenti Gayrat Xasbiullin.

Shu fursatdan foydalanib, OʻFA rahbarlari Abdusalom Azizov, Ravshan Ermatov, Odil Ahmedov va PFL rahbari Diyor Imomxoʻjayevga alohida rahmat. Ularning bevosita ishtirokida Oʻzbekiston U-17 terma jamoasi Jahon chempionatiga chiqdi, U-20 terma jamoasi Osiyo chempioni boʻldi va Jahon chempionatiga yoʻllanmani qoʻlga kiritdi, Olimpiya terma jamoasi Olimpiadaga tarixiy yoʻllanmani qoʻlga kiritdi va milliy terma jamoa JCh saralashida muvaffaqiyatli odimlamoqda. Aynan mana shu omil yevropalik skautlarning oʻzbek futbolchilariga e'tibor qaratishlariga sabab boʻldi. Bu insonlarga katta rahmat va mehnatlari uchun ta'zim qilaman.

Oʻzbekiston va qozogʻistonlik futbolchilarni iliq kutib olgani uchun Belarus mamlakati va belarus xalqiga minnatdorlik bildiraman. Futbolchilarning rivojlanishida belaruslik murabbiylar Anatoliy Yurevich va Vladimir Belyavskiyning hissasi katta.

Ogʻir damlarda toʻgʻri maslahatlar bergan va qoʻllab-quvvatlagan ustozlarimiz Rustam aka Mirsodiqov, Marat aka va Aleksandr Azimovga katta rahmat aytmoqchiman.

Bu bizning umumiy gʻalabamiz boʻlib, futbolchilarimizga Evropada oʻynash va milliy terma jamoani xalqaro maydonda munosib himoya qilish imkonini bermoqda.

Abduqodir Husanovning transferi – bizning umumiy gʻalabamiz. Umid qilamanki, bu Oʻzbekiston va Qozogʻiston futboli rivojini yanada tezlashtiradi. Umid qilamanki, bu transfer qolgan futbolchilarimizning Evropa va xalqaro maydonda munosib ishtirok etishda davom etishlari, milliy terma jamoalarimiz safida yaxshi oʻynashlariga sabab boʻladi", – dedi Asanbayev. “Zamin” yangiliklarini “Telegram”da kuzatib boring