Klaudio Raneri Eldor Shomurodov masalasiga qanday nuqta qoʻydi?

Oʻzbekiston milliy terma jamoasi sardori va eng zoʻr toʻpurari Eldor Shomurodovning “Roma”dagi kelajagi mavhum boʻlib turgandi.

Ayniqsa, qishki transfer bozori ochilgaridan beri A Seriya jamoalaridan bir nechtasi oʻzbek hujumchisini ijaraga olish boʻyicha Rim klubiga murojaat qilib kelmoqda. Hamyurtimizga Italiyada va Germaniya klublaridan qiziqish boʻlayotgani xabar qilindi.

Biroq, bu borada “Kalyari”, “Empoli” va “Venetsiya” 29 yoshli hujumchini olish uchun Rim klubiga murojaat qildi.

Eldor Shomurodov uchun kurashda bir necha bor favorit oʻzgardi. Italiya matbuoti “Venetsiya” vakillari mavsum yakunlanganidan keyin oʻzbek legionerini toʻliq transfer qilish majburiyatini olishini bildirgan edi. Bir necha manbalar bu taklif “Roma”ga ma'qul kelgani va transfer tez orada amalga oshishini yozmoqda.

“Roma” navbatdagi turda “Udineze” mehmoni boʻlib, 2:1 hisobida zafar quchdi. Shomurodov tanaffusdan keyin Zeki Chelik oʻrnini egallab, bir boʻlim toʻliq oʻynadi. Bellashuvning ikkinchi yarmida Eldor jamoasining asosiy figurasiga aylandi va gʻalabaga katta hissa qoʻshdi.

Aynan mana shu uchrashuvdan keyin rimliklar bosh murabbiyi Klaudio Raneri oʻzbek futbolchisining “Venetsiya”ga oʻtishi haqidagi savolga javob berib, Eldor atrofidagi vaziyatga oydinlik kiritdi.

Nufuzli manbalardan biri – tuttomercatoweb.com portali tajribali mutaxassisning quyidagi munosabatini keltirdi.

- "Transfer haqida gap-soʻz boʻlishi mumkin emas, men shu erda ekanman bu yigitlardan foydalanishda davom etaman.

“Udineze” oʻyin borasida “AZ Alkmaar”dan keskin farq qiladi va men bu oʻyinda Eldor Shomurodov foyda keltira oladi, degan xulosaga keldim. Siz raqibning qanday zich himoyalanganini koʻrdingizmi? Koʻpgina kuchli jamoalar bu erda ochko yoʻqotgan.

Men Shomurodovning imkoniyatlarini yaxshi bilaman. U bilan “Kalyari”da ishlaganman. Bu uchrashuvda Eldor pleymeyker vazifasini oʻz zimmasiga oldi, maydon ichkarisidan hujumlarni tashkil qilishda jonbozlik koʻrsatdi.

Agar unda yanada kuchayish imkoniyati yuzaga kelsa, buni nazardan qochirmayman, klubdagilarni kuzatib boraman. Shomurodov jiddiy professional oʻyinchi. Bunaqa tipdagi oʻyinchi bilan ishlayotanimdan baxtiyorman", - dedi Klaudio Raneri.

Eldor Shomurodov joriy mavsumda barcha turnirlarda 16 marotaba maydonga tushib, ikkita gol va bitta assist muallifi boʻldi. Transfermarkt portali oʻzbekistonlik forvardning transfer summasini 4 million yevroga baholanmoqda. “Zamin” yangiliklarini “Telegram”da kuzatib boring