Shahboz Umarov ilk turda Premer-liganing eng yaxshi futbolchisi deb tan olindi

Qozog‘iston Premer-ligasining 2025 yilgi mavsumi qizg‘in start oldi va ilk turda o‘zbekistonlik futbolchi Shahboz Umarov eng yaxshi o‘yinchi sifatida e’tirof etildi.

Umarov – ramziy terma jamoada!

Har bir turda futbolchilarning harakatlarini tahlil qiladigan Sofascore statistika portali ilk turda eng yuqori bahoni aynan “Turon” klubi vakili – Shahboz Umarovga berdi. Umarov “Okjetpes”ga qarshi uchrashuvda nafaqat hisobni ochdi, balki ikkinchi golga assistentlik qilib, jamoasining 2:0 hisobidagi g‘alabasida hal qiluvchi rol o‘ynadi. Hujumkor yarim himoyachining ushbu ajoyib o‘yini 9,6 ball bilan baholandi.

“Chelsi” futbolchisi terma jamoadan chetda qoldi

Qozog‘iston futboli muxlislari bu galgi ramziy terma jamoaga yana bir futbolchi – amaldagi chempion “Qayrat” hujumchisi Doston Satpayev kiritilmaganiga e’tibor qaratdi. Jamoasi safida debyut uchrashuvdayoq raqib darvozasini ishg‘ol qilgan 16 yoshli futbolchi yaqinda “Chelsi” bilan shartnoma imzolagani tufayli katta shov-shuvga sabab bo‘lgan edi.

Qozog‘istondagi o‘zbek futbolchilari

Joriy mavsumda Qozog‘iston Premer-ligasida “Turon” klubi o‘zbekistonlik futbolchilar bilan boyitildi. Turkiston jamoasi safiga Shahboz Umarov, Odiljon Abdumajidov, Behruz Asqarov va Xurshid Muxtorov qo‘shildi.

Shahboz Umarov – 2022 yildan buyon Qozog‘iston chempionatida o‘ynayotgan tajribali qanot hujumchisi. 2023 yilda “Ordabasi” bilan mamlakat chempioni va kubok sohibi bo‘lgan.

Odiljon Abdumajidov – 23 yoshli markaziy himoyachi. O‘zbekistonda “Metallurg”, “Olimpik” va “Dinamo Samarqand”da o‘ynagan.

Xurshidbek Muxtorov – 31 yoshli tajribali himoyachi. Bungacha “Nasaf”, “Lokomotiv”, “Qo‘qon-1912” va “Neftchi” kabi jamoalarda o‘ynagan.

Behruz Asqarov – 21 yoshli hujumkor futbolchi. “Paxtakor” tarbiyalanuvchisi, bu mavsumni tajriba to‘plash maqsadida ijarada o‘tkazadi.

Turkiston viloyatining “Turon” jamoasiga o‘zbekistonlik ishqibozlar alohida qiziqish bildirishmoqda, chunki jamoa safida to‘rt nafar o‘zbek futbolchisi bor va ular asosiy tarkib uchun real raqobatchi hisoblanadi.

Shahboz Umarov ilk turdagi ajoyib o‘yini bilan Qozog‘iston chempionatidagi eng yaxshi futbolchi sifatida e’tirof etildi va jamoasiga muvaffaqiyatli mavsum olib kelishga umid qilmoqda! “Zamin” yangiliklarini “Telegram”da kuzatib boring