Klaudio Raneri “Roma”dagi kelajagini ochiq qildi — bosh murabbiylikdan keyingi yangi rol tayyormi?

Rimning “Roma” klubi bu mavsumda futbol muxlislari uchun haqiqiy “qayta tug‘ilish” ertagiga aylandi. Taniqli mutaxassis Klaudio Raneri jamoani 2024 yil noyabrida qabul qilib, jadvalning pastki qismidagi jamoani Chempionlar Ligasi uchun kurashadigan darajaga olib chiqdi. Endi esa u o‘zining keyingi qadami haqida rasman gapirdi.

Raneri – murabbiydan strategik maslahatchiga

Ma’lum qilinishicha, mavsum yakunlangandan so‘ng Klaudio Raneri “Roma”da ma’muriy lavozim — bosh maslahatchi sifatida faoliyat yuritishni rejalashtirgan. Uning so‘zlariga ko‘ra, u jamoa uchun “yo‘l ko‘rsatuvchi” vazifasini bajaradi.

“Men bosh maslahatchi bo‘laman. Klub uchun yo‘l ko‘rsatuvchi bo‘lishimni bilaman — nima to‘g‘ri, nima noto‘g‘ri ekanligini maslahat beraman. Biroq, yakuniy qarorni klub egasi qabul qiladi. Muxlislar shuni bilishlari kerakki, agar fikrim inobatga olinmasa, faqat shundagina ketaman. Bugun o‘zimni loyihaning markazida his qilyapman”, — dedi Raneri jurnalistlarga bergan intervyusida.

“Roma”ga yangi murabbiy kelyaptimi?

Shuningdek, tajribali mutaxassis “Roma”da o‘z o‘rnini bosadigan yangi bosh murabbiy bo‘yicha ish olib borilayotganini ham tasdiqladi. U nomzodlar haqida aniq ma’lumot bermagan bo‘lsa-da, klubda bu borada jiddiy harakatlar ketayapganini qayd etdi.

Bu esa shundan dalolat beradiki, “Roma”ning rahbariyati Raneriga nafaqat bugungi muvaffaqiyatlar uchun, balki kelajakda ham muhim rol bermoqchi. Futbol falsafasi va tajribasi jamoa rivoji uchun xizmat qilishi kutilmoqda.

Nima uchun Raneri “Roma” uchun qimmatli shaxs?

Klaudio Raneri — futbol tarixida o‘z o‘rniga ega mutaxassis. Uning 2016 yilda “Lester” bilan Angliya premer-ligasidagi chempionligi, murabbiylik tajribasi va “Roma”ga bo‘lgan sadoqati jamoa muxlislari orasida hamisha yuksak baholangan.

Hozir esa u “Roma”dagi loyiha markazida ekanligini ta’kidlab, kelajakda ham jamoa yo‘nalishini shakllantirishda faol ishtirok etishini ma’lum qilmoqda. “Zamin”ni Telegramʻda oʻqing!