“Manchester Siti”da katta o‘zgarishlar boshlanmoqda: Ederson Saudiyaga ketadimi?

“Manchester Siti” yozgi transfer oynasida jamoa tarkibini yangilash jarayonini davom ettirishga tayyorlanmoqda. Eʼtibor markazida esa jamoaning asosiy darvozaboni — Ederson.

Saudiya Arabistonidan jiddiy taklif: “Al-Ittihod” ishga kirishdi
Foot Mercato nashrining maʼlumotlariga ko‘ra, Saudiyaning “Al-Ittihod” klubi Edersonni tarkibiga qo‘shib olish uchun jiddiy harakat boshlagan. Jidda shahri klubi mutasaddilari darvozabonning agentlari bilan bir necha marta uchrashuv o‘tkazgan va shu asosda “Manchester Siti” bilan rasmiy muzokaralar boshlangan.

Shartnoma bor, lekin ketish ehtimoli ham kuchli
Edersonning “Siti” bilan amaldagi shartnomasi yana bir mavsumni o‘z ichiga oladi. Shunga qaramay, 31 yoshli golkiper klubni tark etishga qarshi emas.

Manbalarga ko‘ra, u yangi chaqiriq va moliyaviy jihatdan foydaliroq shartnomaga qiziqish bildirmoqda.

Edersonning joriy mavsumdagi ko‘rsatkichlari
- Angliya Premyer-ligasida 22 ta o‘yinda maydonga tushgan,
- Darvozasidan 25 ta to‘p o‘tkazgan,
- 3 ta golli pas amalga oshirgan,
- Shu orqali Premyer-ligada eng ko‘p assist qilgan darvozabon sifatida rekord o‘rnatgan.

Bu natijalar uning nafaqat himoyada, balki hujumni boshlashda ham muhim rol o‘ynayotganini ko‘rsatadi.

“Siti”da davr yakunlanmoqdami?
Ederson “Manchester Siti” safida uzoq yillardan beri asosiy darvozabon sifatida to‘p surmoqda. Ammo jamoada yoshlar bilan tarkibni yangilash siyosati kuchayayotgan bir paytda, yangi nomlarning paydo bo‘lishi Ederson uchun signal bo‘lishi mumkin.

Siz nima deb o‘ylaysiz — Ederson Saudiyaga o‘tishi “Siti” uchun qanday yo‘qotish bo‘ladi? Yosh darvozabonlar uning o‘rnini to‘ldira oladimi? “Zamin”ni Telegramʻda oʻqing!