«Atletiko» «Real»ga qattiq zarba berdi: «Ispan futboli obro‘sini tushirishni to‘xtating!»

Madridning «Atletiko» klubi shahardagi ashaddiy raqibi «Real Madrid»ning kecha Ispaniya Kubogi finali oldidan kelib chiqqan hakamlik mojarosiga nisbatan keskin munosabat bildirdi. «Matraschilar» o‘z rasmiy ijtimoiy tarmoqlarida «qirollik klubi»ning ushbu xatti-harakatlarini juda qattiq tanqid qilib chiqishdi.

«Bu mutlaqo qabul qilib bo‘lmas holatdir! Ispan futboli imijini buzishni bas qiling», — deb yozadi «Atletiko» klubi o‘zining ijtimoiy tarmoqdagi rasmiy akkauntida.

Eslatib o‘tamiz, kecha Ispaniya Kubogi finali oldidan «Real Madrid» rahbariyati, «Barselona» bilan bo‘ladigan uchrashuv uchun tayinlangan hakamlardan keskin noroziligini bildirib chiqqan edi. Madridliklar hakamlar brigadasini o‘zgartirish talabi bilan Ispaniya futbol federatsiyasiga (RFEF) murojaat qilgan va hatto finalda ishtirok etmasligi ham mumkinligini ma’lum qilgandi.

«Real» hakamlar finalda betaraflikni saqlay olmasligini va jamoaga nisbatan ochiqdan-ochiq dushmanlik munosabatida bo‘lganini ta’kidlab, katta mojaroga sabab bo‘lgan edi. Ayniqsa, hakam Rikardo de Burgos Bengoechea va VAR hakami Pablo Gonsales Fuertesning matbuot anjumanida bildirgan so‘zlari vaziyatni yanada keskinlashtirgandi.

Bu mojaro Ispaniya futbolidagi vaziyatni keskinlashtirib, ko‘plab klublar va ommaviy axborot vositalarining diqqat markaziga tushdi. Shuningdek, «Real» va RFEF o‘rtasidagi munosabatlarning yanada yomonlashishiga sabab bo‘lishi mumkinligi aytilmoqda.

Ispaniya Kubogi finali 26 apreldan 27 aprelga o‘tar kechasi, Toshkent vaqti bilan soat 01:00da boshlanadi. «Real» va «Barselona» o‘rtasidagi ushbu bahs butun dunyo futbol muxlislarining diqqat markazida bo‘lishi kutilmoqda. “Zamin”ni Telegramʻda oʻqing!