Joze Mourino ilk marta terma jamoada ish boshlashi mumkin

Jahon futbolidagi eng mashhur va muvaffaqiyatli murabbiylardan biri hisoblanmish Joze Mourino o‘z murabbiylik faoliyati davomida ko‘plab nufuzli klublarda ishlagan. U Portugaliyada «Portu», Ispaniyada «Real Madrid», Angliyada «Chelsi», «Manchester Yunayted», Italiyada «Inter», «Roma» hamda Turkiyada «Fenerbahche» klublariga murabbiylik qilgan.

Biroq, 62 yoshli portugaliyalik taniqli mutaxassis shu vaqtga qadar biror marta ham milliy terma jamoalarni boshqarmagan edi. Endi esa uning murabbiylik faoliyatidagi yangi va muhim bosqich boshlanishi mumkin.

Fichajes nashrining ma’lumotiga ko‘ra, Portugaliya futbol federatsiyasi Joze Mourinoni terma jamoa bosh murabbiyligiga tayinlash bo‘yicha muzokaralarni boshlab yuborgan. Federatsiya 2026 yilda bo‘lib o‘tadigan Jahon chempionatida milliy jamoani aynan Mourinoga ishonib topshirishni rejalashtirgan.

Ma’lumki, Mourino bir necha marta Portugaliya terma jamoasiga ustozlik qilish uning eng katta orzularidan biri ekanligini ochiqchasiga ta’kidlagan. Hozirda Turkiyaning «Fenerbahche» jamoasida faoliyat olib borayotgan mutaxassis uchun endi bu orzu amalga oshishi mumkinligi haqida gapirilmoqda.

Portugaliya futboli rahbarlari bugungi kunda Mourinoni terma jamoaga jalb etish uchun ideal variantlarni ko‘rib chiqishmoqda. Ular tajribali mutaxassis bilan muzokaralarni muvaffaqiyatli yakunlash va uni milliy terma jamoaga olib kelish uchun barcha zaruriy shart-sharoitlarni yaratishga tayyor turishibdi.

Agar bu kelishuv ro‘yobga chiqsa, Joze Mourino o‘zining boy tajribasini birinchi marta milliy terma jamoada qo‘llash imkoniga ega bo‘ladi. Bu esa nafaqat murabbiyning shaxsiy orzusini ro‘yobga chiqaradi, balki Portugaliya terma jamoasining kelajakdagi muvaffaqiyatlari uchun ham muhim qadam bo‘lishi mumkin. “Zamin”ni Telegramʻda oʻqing!