Florian Virs “Real Madrid”da o‘ynashni xohlayapti: transfer amalga oshadimi?

O‘tgan mavsum Germaniyaning “Bayer” klubi o‘z tarixida birinchi marta Bundesliga chempionligini qo‘lga kiritdi. Jamoaning ushbu tarixiy yutug‘ida yosh yulduz Florian Virsning hissasi juda katta bo‘lgan edi.

21 yoshli iqtidor egasi endilikda o‘z faoliyatini yanada yuqori darajaga ko‘tarish uchun yozgi transferlar vaqtida Yevropaning yirik grand klublaridan biriga o‘tish imkoniyatini ko‘rib chiqmoqda.

Hozirda Virsga Yevropaning bir qator yirik klublari jiddiy qiziqish bildiryapti. Xususan, Germaniya grandi “Bavariya”, Angliya chempionati yetakchisi “Manchester Siti” hamda Ispaniyaning mashhur klubi “Real Madrid” futbolchi uchun kurashga tayyor turibdi.

Bild nashri tarqatgan ma’lumotlarga ko‘ra, Florian Virsning o‘zi ham aynan madridliklarning safida o‘ynash istagini bildiryapti. Ayniqsa, uning “Bayer”dagi murabbiyi Xabi Alonso ham yozda “Real”ni qabul qilishi kutilayotgani bu qarorga ta’sir qilmoqda.

Bundan tashqari, Florian Virsning fikricha, agar u “Real Madrid” safida harakat qilsa, Yevropa Chempionlar ligasi kabi nufuzli turnirlarda g‘olib bo‘lish ehtimoli yanada ortadi. Shu sababdan ham yosh futbolchi o‘z kelajagini aynan Ispaniyaning qirollik klubida ko‘rishni afzal bilmoqda.

Eslatib o‘tamiz, Virs ushbu mavsumda ham “Bayer” tarkibida ajoyib harakat qilib, Yevropaning bir nechta yirik klublarini o‘ziga jalb qilishga erishgan. Uning yakuniy qarori yaqin oylarda ma’lum bo‘lishi kutilyapti. “Zamin”ni Telegramʻda oʻqing!