Sherzod A’zamov: «O‘zbek klublari Doriyev kabi o‘yinchilarni olib kelishsa, muxlislar stadionga qaytadi»

«90minutuz» podkastining navbatdagi sonida o‘zbek futbolida o‘z o‘rniga ega bo‘lgan sobiq futbolchi Sherzod A’zamov «So‘g‘diyona» klubining hujumchisi Lyupcho Doriyev va O‘zbekiston jamoalarining legioner tanlash siyosati haqida o‘z fikrlarini bildirdi.

A’zamov «Paxtakor» hujumchisi Dragan Cheran bilan o‘zaro suhbatlashganini eslab o‘tdi va shu orqali bir qancha qiziq ma’lumotlarni ham oshkor qildi:

«Cheran bilan gaplashganimda, u menga "So‘g‘diyona" jamoasining juda yuqori saviyadagi legionerlar bilan shartnoma imzolaganini aytgan edi. O‘sha paytda bu futbolchilar hali O‘zbekistonga kelib ham ulgurmagandi. Dragan ularning yuqori sifatli va yaxshi futbolchilar ekanligini, ammo juda qimmatga tushayotganini ham alohida ta’kidlagandi», – dedi sobiq futbolchi.

A’zamovning ta’kidlashicha, makedoniyalik hujumchi Lyupcho Doriyevning «So‘g‘diyona»dagi maoshi O‘zbekiston futboli uchun katta miqdorni tashkil etgan:

«Ma’lum bo‘lishicha, Doriyev "So‘g‘diyona" bilan shartnoma imzolagan paytida oyiga 30 ming dollar maosh olgan ekan. Bu juda katta summa. O‘sha paytda "So‘g‘diyona" klubi Dragan Cheranni ham o‘z safida ko‘rishni xohlagan va unga ham shunga yaqin summa taklif qilgan ekan», – deya tushuntirdi Sherzod A’zamov.

Shuningdek, sobiq futbolchi jizzaxliklar tomonidan tanlangan legionerlarni yuqori baholar ekan, o‘zbek futbolidagi ayrim klublarning kuchsiz legionerlarga ortiqcha mablag‘ sarflayotganidan norozi ekanligini bildirdi:

«"So‘g‘diyona"ni o‘rtacha klubdan bir pog‘ona yuqoriroq deb qabul qilsak, ular legioner tanlashda ajoyib ish qildi. Bu kabi legionerlar haqiqatan ham shunga arziydigan darajada futbolchilardir. O‘zbekiston klublari besh nafar o‘rtacha saviyadagi legionerni olib kelish o‘rniga, bitta Doriyev kabi yuqori darajali o‘yinchini taklif qilgani yaxshiroq emasmi? Agar shunday bo‘lsa, muxlislar albatta stadionga qaytadi», – deb ta’kidladi u.

A’zamov bu borada «Nasaf» klubi misolida Artur Gevorkyanning faoliyatini ham eslab o‘tdi:

«Masalan, o‘z vaqtida Artur Gevorkyan "Sho‘rtan" va "Paxtakor" jamoalarida o‘z o‘rnini topa olmagan edi. Lekin u "Nasaf"ga kelganidan keyin Karshidagi stadionga yuzlab, hatto minglab muxlislar faqat uning o‘yinini tomosha qilish uchun kela boshladi. Bu – sifatli legionerlarning muhimligini ko‘rsatuvchi yorqin misoldir», – dedi Sherzod A’zamov.

Haqiqatan ham, yuqori darajali legionerlarning kelishi O‘zbekiston futboliga qiziqishni oshiradi va muxlislarni yana stadionlarga qaytaradi. Bu esa mamlakat futboli uchun ijobiy o‘zgarishlarning boshlanishi bo‘lishi mumkin. “Zamin”ni Telegramʻda oʻqing!