Kuchli raqiblar, qiyin taqvim va katta umidlar: CAFA U17 2025 ertaga start oladi

Ertaga, 24 may kuni Toshkent viloyatidagi “Do‘stlik” stadionida CAFA U17 Championship 2025 musobaqasiga start beriladi. Markaziy Osiyo futbol assotsiatsiyasi tomonidan tashkil etiladigan ushbu nufuzli musobaqa o‘smirlar o‘rtasidagi eng muhim turnirlardan biri hisoblanadi.

Musobaqaning guruh bosqichiga qur’a tashlash marosimida ma’lum bo‘lishicha, O‘zbekiston o‘smirlar terma jamoasi “A” guruhidan joy oldi. Sergey Chigodayev boshchiligidagi terma jamoamiz Eron va Qirg‘iziston kabi ancha kuchli raqiblar bilan to‘qnash keladi. “V” guruhida esa Afg‘oniston, Tojikiston va Turkmaniston kabi jamoalar o‘zaro bellashadi.

Jamoamiz 24 may kuni Qirg‘izistonga qarshi musobaqani boshlaydi. Bu uchrashuv soat 20:30 da start oladi. 28 mayda esa O‘zbekiston o‘smirlari Eronga qarshi maydonga tushadi. Bu o‘yin ham muxlislar uchun qiziqarli va prinsipial bahs bo‘lishi kutilmoqda.

CAFA U17 Championship 2025 musobaqasining final uchrashuvi 31 may kuni 19:30 da bo‘lib o‘tadi. Shu kuni chempion aniqlanadi. Unga qadar esa 30 mayda 5–6 va 3–4-o‘rin uchun uchrashuvlar o‘tkaziladi.

Turnir doirasidagi barcha uchrashuvlar Toshkent viloyatidagi “Do‘stlik” stadionida tashkil etiladi. Bu stadion ko‘plab yoshlar musobaqalariga mezbonlik qilgan va milliy terma jamoalarning rivojlanishida muhim maydon hisoblanadi.

Zamin.uz tahririyati CAFA U17 2025 musobaqasida qatnashadigan o‘smirlarimizning barcha uchrashuvlarini yoritib borishda davom etadi. Ushbu turnir orqali kelajak yulduzlari yuzaga chiqishi mumkin. Sizcha, O‘zbekiston terma jamoasi bu galgi turnirda finalgacha yetib bora oladimi? “Zamin”ni Telegramʻda oʻqing!