Abbosbek Fayzullayev: “Maqsadim — Yevropada top-klubda o‘ynash!”

O‘zbek futbolida so‘nggi yillarda yaqqol porlagan yulduzlardan biri bo‘lgan Abbosbek Fayzullayev yakunlangan mavsumda o‘z nomini nafaqat mahalliy, balki xalqaro futbol maydonlarida ham mustahkam o‘rnatishga muvaffaq bo‘ldi. Hozirda Rossiyaning SSKA klubi safida to‘p surayotgan 21 yoshli hujumkor futbolchi nafaqat jamoasi bilan muvaffaqiyatlarga erishdi, balki Osiyoning eng yaxshi yosh futbolchisi sifatida ham tan olindi.

Fayzullayev mavsum davomida Rossiya chempionati bronza medalini qo‘lga kiritdi va Rossiya kubogida zafar quchdi. Bundan tashqari, O‘zbekiston milliy terma jamoasi bilan 2026 yilgi jahon chempionati saralash bosqichida tarixiy natija qayd etib, mamlakatni ilk bor mundialga olib chiqdi.

Jurnalist Nobel Arustamyan bilan suhbatda Abbosbek o‘ziga xos kamtarlik bilan javob berdi: — Men ota-onamni xursand qildim, ular bu yutuqni chin dildan his qildi. Lekin men hali juda ko‘p narsalarga erishishni xohlayman. "Real" yoki "Barselona" — bu kabi klublarda o‘ynash mening orzum va maqsadim.

Xvicha Kvaratsxeliya kabi futbolchilar unga ilhom manbai bo‘lib xizmat qilayotganini ta’kidlagan Abbosbek, shu bilan birga, Germaniyaning “Bavariya” klubi skautlarining e’tiboriga tushgani haqida ham to‘xtaldi.

“SSKAda shartnomam bor, lekin maqsadim doimo aniq bo‘lgan – Yevropaga chiqish. Har bir futbolchi orzu qiladigan joy – u yerda men ham to‘p surishni istayman”, – dedi u.

Abbosbekning orzulari tasodif emas. U allaqachon SSKA safida o‘z salohiyatini namoyish qilib ulgurdi — 71 o‘yinda 8 gol va 22 assist bilan jamoada muhim figuraga aylandi. Bu raqamlar o‘zbek legioneri uchun jiddiy Yevropa klublari diqqat markazida ekanini isbotlaydi.

Uning faoliyati “Paxtakor” akademiyasida boshlangan. Jamoadagi 41 uchrashuvda u 10 ta gol va 3 ta assist bilan maydonni tark etgan. 2023 yilning avgustida SSKA safiga qo‘shilgan futbolchi, qisqa vaqt ichida rossiyalik muxlislar e’tiborini qozondi.

Fayzullayev terma jamoada ham o‘z nomini mustahkamlashga ulgurdi. U 27 uchrashuvda 8 ta gol urib, O‘zbekiston milliy jamoasining Jahon chempionati yo‘llanmasini qo‘lga kiritishida muhim rol o‘ynadi. Katta musobaqalardagi tajribasi va o‘z ustida ishlashi uni kelajakdagi top-klublar nomzodiga aylantirmoqda.

Abbosbek Fayzullayev nafaqat ijobiy natijalar, balki qarashlari, o‘zini tinimsiz rivojlantirishga intilishi, katta orzulari bilan ham yosh avlodga namuna bo‘lib qolmoqda. Uning har bir so‘zida mehnat, iroda va uzluksiz o‘sishga ishtiyoq bor.

Yosh iqtidor sohibi oldida yana ko‘p marralar bor. Muxlislar esa uning orzulari ro‘yobga chiqishini, Yevropaning eng yirik arenalarida o‘zbek bayrog‘ini baland ko‘tarishini intizorlik bilan kutmoqda. “Zamin”ni Telegramʻda oʻqing!