Yevropani zeriktirgan Eldorga endi turklar navbatda turishibdi

O‘zbekiston milliy terma jamoasining sardori va 2026 yilgi Jahon chempionati yo‘llanmasini ta’minlagan asosiy to‘purari Eldor Shomurodov atrofida yoz mavsumi bilan birga yangi transfer shov-shuvlari boshlandi. Italyan futbolida faoliyat yuritib kelayotgan o‘zbek forvardining “Roma” klubidagi kelajagi hozircha noaniq bo‘lib turibdi. Unga bo‘lgan talab esa tobora ortib bormoqda.

Ma’lumki, “Roma” jamoasida mavsum yakunlangach, bosh murabbiy o‘zgardi. Eldorning professional o‘sishiga katta ta’sir ko‘rsatgan va unga ishongan mutaxassis — Klaudio Raneri jamoani tark etdi. Uning o‘rniga esa “Atalanta” bilan tanilgan Jan Pero Gasperini keldi. Bu albatta tarkibda jiddiy o‘zgarishlar bo‘lishiga sababchi bo‘lmoqda. Italiya futboli tahlilchilariga ko‘ra, Gasperini hujum chizig‘ida ilk navbatda islohot o‘tkazishni maqsad qilgan.

Shunday vaziyatda, bir necha yillardan buyon Yevropaning yuqori saviyadagi chempionatlarida o‘zini ko‘rsatayotgan futbolchilarga qiziqish bildirib kelayotgan Turkiya Superligasi klublari ham qo‘l qovushtirib o‘tirmaydi. Xususan, gazetearena.com sayti yozishicha, Turkiyaning mashhur klublaridan biri — “Bashakshehir” o‘z hujumini kuchaytirish maqsadida aynan Eldor Shomurodov nomzodiga jiddiy e’tibor qarata boshlagan.

“Galatasaroy”, “Fenerbaxche”, “Beshiktosh”, “Trabzonspor” kabi klublar o‘z transfer ro‘yxatlarini shakllantirish bilan ovora bo‘lib turgan bir paytda, “Bashakshehir” Shomurodov bilan bevosita muzokaralarga kirishgani aytilmoqda.

Ma’lumotlarga ko‘ra, Eldor “Roma” safidagi so‘nggi mavsumda 37 uchrashuvda maydonga tushgan. Ushbu bahslarda u 7 ta gol va 5 ta golli uzatma muallifiga aylangan. Gol urishdagi samaradorligi har 209 daqiqaga to‘g‘ri kelgan bo‘lsa-da, ko‘pgina o‘yinlarda u to‘liq harakat qilmaganini inobatga olsak, bu ko‘rsatkich yetarli darajada yaxshi deb baholanmoqda.

Shomurodovning futbolga bo‘lgan qiziqishi “Mash’al” akademiyasida shakllangan. Keyinchalik u “Bunyodkor” safida porlab, 2017 yili Rossiyaning “Rostov” klubiga yo‘l oldi. Bu transfer orqali u xalqaro maydonga chiqqan va uch yil davomida transfer bahosi 750 ming yevrodan 6,5 million yevrogacha oshgan. Keyinchalik, 2020 yil “Jenoa” futbolchisiga aylangan Eldor uchun klub 9,5 million yevro to‘lagan. Ordan ikki mavsum o‘tib, “Roma” uni 19,5 million yevro evaziga o‘z safiga qo‘shgan.

O‘zbek futbolida bunday yo‘nalishdagi karyeraga erishgan futbolchilar sanoqli. Eldorning klub darajasidagi yutuqlari, milliy terma jamoadagi katta hissasi va 82 uchrashuvda 42 ta gol urishga erishgani uni o‘z yurtida eng kuchli hujumchiga aylantirdi. Bo‘yi 1,90 metr keladigan hujumchi har ikki qanotda, markaziy hujumchi sifatida va hatto ikki hujumchi sxemasida ham mukammal harakat qila oladi.

Ayni damda “Bashakshehir” klubi va futbolchining agentlari o‘rtasida muzokaralar davom etmoqda. Xabarlarga qaraganda, tomonlar o‘rtasida kelishuvga erishish ehtimoli juda yuqori. Turk Superligasi o‘zbek yulduzi uchun yangi chaqiruv bo‘lishi mumkin.

Shunday qilib, Eldor Shomurodov uchun navbatdagi manzil Turkiya bo‘ladimi, yoki u yana Italiyada qoladimi — bu yaqin orada ma’lum bo‘ladi. Bir narsa aniq: u qanday qaror qilmasin, o‘zbek muxlislari uni qo‘llab-quvvatlashda davom etadi. “Zamin”ni Telegramʻda oʻqing!