Teo Ernandes “Al Hilol”ga o‘tib, yillik 30 mln yevro oladi

Saudiya Arabistonining eng faol va mablag‘ jihatdan to‘la klublaridan biri — “Al Hilol” yana bir kuchli futbolchini o‘z safiga qo‘shish arafasida. Bu galgi yo‘nalish — Yevropaning grand jamoasi “Milan”ning asosiy himoyachisi Teo Ernandes bo‘ldi.

Yaqin manbalarning xabar berishicha, klublar o‘rtasidagi muzokaralar deyarli yakunlangan va transferning umumiy narxi 35 million yevroni tashkil etadi — 30 million yevro darhol, 5 million yevro esa bonus sifatida to‘lanadi. Teo “Al Hilol” bilan 3 yillik shartnomaga imzo chekmoqda va yillik maoshi 30 million yevroni tashkil etadi. Bu — nafaqat futbolchi karerasida, balki Ligadagi himoyachilar uchun ham eng yuqori to‘lovlardan biriga aylanishi mumkin.

Tajribali fransuz himoyachisi o‘tgan mavsumda “Milan” safida 49 ta rasmiy o‘yinda maydonga tushib, 5 ta gol va 6 ta assist muallifi bo‘ldi. Uning barqaror o‘yini va faol hujumkor harakatlari “rossonerilar”ning muhim qurollaridan biriga aylangan edi.

Fransiya terma jamoasi a’zosi bo‘lgan Teo Ernandesning “Milan” bilan amaldagi shartnomasi 2025 yil yozida yakunlanishi kerak edi. Ammo Saudiya klubining yuqori maosh taklifi va “Milan”ning uni transfer orqali mablag‘lash imkonini qo‘ldan chiqarishni istamasligi ushbu kelishuvni tezlashtirdi.

“Al Hilol” bu orqali yana bir bor o‘zining jiddiy maqsadlar sari ilgarilayotganini namoyon etmoqda. Klub tarkibida allaqachon Serj Milinkovich-Savich, Kalidu Kulibali, Ruben Nevesh kabi yulduzlar to‘p surayotgani inobatga olinsa, Teo Ernandesning kelishidan so‘ng jamoa yanada muvozanatli va xavfli bo‘lishi aniq.

Zamin.uz tahlilchilari ta’kidlashicha, Saudiya Ligasi yildan yilga jahon yulduzlarini jalb etish orqali nafaqat tijoriy, balki sport jihatdan ham e’tiborli nuqtaga aylanib bormoqda. Teo Ernandesning ushbu transferi esa bu jarayondagi yana bir katta qadam bo‘lishi shubhasiz. “Zamin”ni Telegramʻda oʻqing!