Shov-shuvga chek qo‘yildi: Ederson “Siti”da qolishini tasdiqladi

So‘nggi haftalarda jahon futbolidagi turli xabarlar orasida “Manchester Siti”ning tajribali darvozaboni Edersonning taqdiri ham jiddiy muhokamalarga sabab bo‘ldi. Bir qator nashrlar uning yozgi transfer oynasida klubni tark etishi va Saudiya Arabistoni chempionatiga yo‘l olishi mumkinligini yozib chiqqan edi. Biroq bu mish-mishlarga darvozabonning o‘zi chek qo‘ydi.

Taniqli insayder Fabritsio Romano tarqatgan ma’lumotlarga ko‘ra, Ederson o‘z kelajagini aynan “Manchester Siti” bilan bog‘lamoqda. Braziliyalik posbon shunday dedi: “Mening kelajagim “Siti” bilan bog‘langan. Bu yozda men klubni tark etmayman”.

Bu gaplar Edersonning jamoaga sodiq qolish niyati borligini tasdiqlaydi. E’tiborlisi shundaki, keyingi paytlarda Saudiya Arabistonidagi top-klublar bir qator yevropalik yulduzlarni o‘z safiga qo‘shishga jiddiy urinmoqda. Ular katta moliyaviy takliflar bilan ko‘plab mashhur futbolchilarni jalb qilgani kabi, Edersonga ham qiziqish bildirgani haqida xabarlar tarqalgandi.

Biroq tajribali darvozabonning qaroridan keyin “Siti” murabbiylar shtabi va muxlislari yengil nafas olgani shubhasiz. Zero, u jamoa uchun ko‘p yillar davomida asosiy tayanchlardan biri bo‘lib kelmoqda. Ederson o‘tgan mavsumning o‘zida barcha musobaqalarda 38 ta uchrashuvda ishtirok etdi. Uning kuchli reaksiyasi, pas berishdagi aniqligi va taktik fikrlashi ko‘plab o‘yinlarda hal qiluvchi ahamiyat kasb etgan.

Eslatib o‘tamiz, Edersonning “Manchester Siti” bilan tuzgan shartnomasi 2026 yilning iyunigacha amal qiladi. U jamoaga 2017 yilda Portugaliyaning “Benfika” klubidan kelib qo‘shilgan edi. Shu paytgacha u klub bilan bir qator trofeylarni, jumladan, Angliya Premer-ligasi, Kubok va Superkuboklar, shuningdek, Chempionlar Ligasini ham qo‘lga kiritgan.

Darvoqe, Edersonning Saudiyaga ketishi borasidagi shov-shuvli gap-so‘zlar fonida u o‘zining pozitsiyasini aniq bildirdi va bu orqali nafaqat o‘zini, balki klubni ham ortiqcha mish-mishlardan asradi. Uning jamoada qolishi “Siti”ning yangi mavsumdagi rejalariga ham katta ta’sir ko‘rsatadi.

Hozircha “Manchester Siti” transfer bozorida faol harakat qilmoqda, ammo jamoaning asosiy ustunlaridan biri bo‘lgan Edersonning joyi o‘zgarmasligi jamoada barqarorlikni ta’minlashi mumkin. “Zamin”ni Telegramʻda oʻqing!