Yevropa futbolida moliyaviy intizom yana markaziy masalalardan biriga aylandi. UYEFA 2024 yil moliyaviy natijalari asosida beshta top-klubga jiddiy jarimalar qo‘lladi, deb xabar berdi rasmiy manbalar. Jazo sababi – klublar o‘z daromadlariga nisbatan jamoa tarkibiga keragidan ortiq xarajat qilgani bilan bog‘liq.
Ma’lumki, UYEFA tomonidan joriy etilgan moliyaviy feyr-pley qoidalari har bir jamoa xarajatlarini qat’iy nazorat qiladi. 2024 yilda xarajat limiti klub yillik daromadining 80 foizi etib belgilangan edi. Yaqin ikki mavsumda bu ko‘rsatkich yanada qat’iylashtirilib, 2025/26 yildan 70 foizga tushiriladi. Bu qaror moliyaviy barqarorlik va futbolda teng raqobatni ta’minlash maqsadida amalga oshirilgan.
UYEFA ma’lumotlariga ko‘ra, ushbu limitni buzgan besh klub aniqlangan – ularning xarajatlari 80%dan 90%gacha bo‘lgan. Bu esa feyr-pley talablarini sezilarli darajada buzish demak.
Shu bois, quyidagi klublarga millionlab yevro miqdorida jarimalar tayinlandi:
- “Chelsi” – 20 million yevro
- “Barselona” – 15 million yevro
- “Lion” – 12 million yevro
- “Aston Villa” – 11 million yevro
- “Roma” – 3 million yevro
UYEFA ta’kidlaganidek, har bir klub xarajat limitini qay darajada oshirganiga qarab, individual tarzda jazolandi. Jarimalar mutlaq tarzda qo‘llanilib, hech bir jamoaga imtiyoz berilmadi.
Ekspertlar fikricha, bu qaror Yevropa futbolida moliyaviy intizomni yanada kuchaytirish va klublarni mas’uliyatli xarajat siyosatiga undashga qaratilgan. Kelgusi mavsumlarda bu kabi qoidalar va jazolar yanada ko‘payishi kutilmoqda.
Muxlislar va tahlilchilar esa, endi klublar faqat futbol natijalari bilan emas, balki moliyaviy sog‘lomlik va feyr-pleyga rioya etish bilan ham raqobatlashishiga ishona boshladi. Yevropa grandlari uchun moliyaviy intizom – yangi davrning muhim shartlaridan biriga aylandi. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
