Yoaxim Lyovga yangi chaqiruv: mashhur murabbiy futbolga qaytish arafasida

Germaniya futbolining eng yirik shaxslaridan biri, milliy terma jamoani dunyo chempioniga aylantirgan Yoaxim Lyov faoliyatga qaytayotgani haqida ishora qildi.

Unga yaqin kunlarda turli klublar va bitta milliy assotsiatsiyadan rasmiy takliflar kelib tushgani ma’lum bo‘ldi. Bu haqda u Germaniyaning mashhur "Yevropa parki"da bo‘lib o‘tgan tadbirda ochiqcha gapirdi, deb xabar berdi swr.de.

"So‘nggi bir-ikki hafta ichida menga murojaat qilib, suhbatlashishga tayyorligimni va qiziqishim bor-yo‘qligini so‘rashdi", — dedi tajribali mutaxassis.

Yoaxim Lyov bu takliflar yuzasidan hozircha qaror chiqarmaganini, ammo har bir taklifni diqqat bilan o‘rganayotganini bildirgan. Uning aytishicha, endigi bosqichda u jamoalarning imkoniyatlari, tarkibi, maqsadlari va yondashuvlarini puxta tahlil qiladi. Agar barchasi muvofiq kelsa, u mas’ullar bilan yuzma-yuz uchrashuv o‘tkazishni ham istamoqda.

Bu, albatta, futbol jamoatchiligida qiziqish uyg‘otdi. Chunki Lyov nomini eshitgandayoq ko‘z oldingizga Jahon chempionatining oltin medalini yutadigan kuchli Germaniya keladi. 2014 yildagi Braziliyadagi mundialda aynan Lyov boshchiligidagi Germaniya tarixda ilk bor Janubiy Amerikadagi jahon chempionatida g‘olib chiqqan yengilmas Yevropa termasi bo‘lgan edi.

Shundan so‘ng u yana bir necha yil terma jamoaga rahbarlik qildi, ammo 2021 yilda o‘z ixtiyori bilan lavozimni tark etdi. Shundan buyon u ish faoliyatidan tanaffus olib, futbol hayotidan biroz chetda yurgan edi.

Ayni paytda esa, uning yangi chaqiruvlarga jiddiy yondashayotgani, yana katta futbolga qaytishga tayyorlanayotganidan darak bermoqda. Muxlislar o‘rtasida esa unga qaysi jamoa murojaat qilgani borasida turli taxminlar yangrayapti.

Qiziq tomoni, avvalroq O‘zbekiston futbol assotsiatsiyasi ham nemis mutaxassisi bilan muzokara olib borayotgani haqida xabarlar tarqalgan edi. Agar bu xabarlar rost bo‘lsa, Lyovni o‘zbek futbolida ko‘rish ehtimoli ham mavjud.

Uning qayta ish boshlashi nafaqat murabbiylik tajribasi, balki zamonaviy futbolga bo‘lgan yondashuvi bilan har qanday jamoa uchun katta boylik bo‘lishi shubhasiz. Shuning uchun uning keyingi qadamlari futbol olami uchun qiziqarli ssenariylarga yo‘l ochishi mumkin. “Zamin”ni Telegramʻda oʻqing!