2025-yil 27-iyul, yakshanba kuni ertalab Qozog‘istonlik UFC jangchisi Shavkat Rahmonovning turmush o‘rtog‘i Gulayim Rahmonova va uning 2022-yilda tug‘ilgan o‘g‘li yo‘l-transport hodisasiga uchradi, deb xabar bermoqda Sports.kz saytiga tayangan holda Zamin.uz. Fojiali hodisa Jambil viloyatining Muyinqum tumanidan o‘tuvchi Almaty–Yekaterinburg avtomobil yo‘lining 296-kilometrida sodir bo‘lgan.
Ma’lumotlarga ko‘ra, Gulayim Rahmonova Toyota Land Cruiser rusumli avtomashinani boshqarayotgan bo‘lgan. U Qarag‘andadan Almatyga qarab yo‘l olgan paytda, Aqsuyek qishlog‘i yaqinida mashina boshqaruvni yo‘qotib, ag‘darilib ketgan. Avtomobilda uning kichik o‘g‘li va yana ikki yo‘lovchi bo‘lgan. Afsuski, ikki yo‘lovchi halokat joyida vafot etgan.
Gulayim Rahmonova va uning o‘g‘li esa zudlik bilan shahardagi shifoxonaga yetkazilgan. Hozirda ular travmatologiya bo‘limida davolanmoqda. Shifokorlar holatni “o‘rtacha og‘ir” deb baholamoqda. Ularga zaruriy tibbiy yordam ko‘rsatilmoqda va ahvoli mutaxassislar nazoratida.
Qozog‘iston Respublikasi Jinoyat kodeksining 345-moddasiga ko‘ra, transport vositasini ehtiyotsizlik bilan boshqarish natijasida inson salomatligiga zarar yetkazish yoki o‘limga sabab bo‘lish jinoyat hisoblanadi. Shu sababli, hodisa yuzasidan tergov ishlari boshlangan.
Hozircha Shavkat Rahmonov ushbu hodisa haqida ommaviy axborot vositalarida yoki shaxsiy sahifalarida izoh bermagan. Jamoatchilik va sport ixlosmandlari ushbu voqeadan xavotirda va sportchining oilasiga ijtimoiy tarmoqlar orqali dalda yo‘llamoqda.
“Zamin”ni Telegramʻda oʻqing!
