Irlandiyalik mashhur MMA yulduzi Konor Makgregorning navbatdagi jangini qayerda va qay tarzda o‘tkazishi haqidagi savollarga javob paydo bo‘ldi. Kutilmagan holda u o‘zining keyingi chiqishini UFC oktagonida emas, balki Bare Knuckle Fighting Championship (BKFC) ligasida amalga oshiradi.
BKFC promousheni rahbari Devid Feldman Nyu-Jerside o‘tkazilgan matbuot anjumanida bu haqda to‘xtalib o‘tdi. Uning so‘zlariga ko‘ra, Konor aslida anjumanda qatnashishi kerak edi, ammo u mashg‘ulotlarga to‘liq diqqat qaratgani uchun kelolmadi.
“Bugun, do‘stim Konor biz bilan bo‘lishi zarur edi. Biroq u hozir mashg‘ulotlar bilan band. Ishoninglar, bu men ko‘rgan eng yaxshi Konor. U xuddi oldingi janglariga qaraganda ham qattiqroq mashq qilyapti. Katta ehtimol bilan irlandiyalikning keyingi raqibi Jeremi Stivenson va Mayk Perri o‘rtasidagi to‘qnashuv g‘olibi bo‘ladi”, — deya ta’kidladi Feldman.
Shu tariqa, Makgregorning keyingi jangini kimga qarshi o‘tkazishi borasida aniqlik paydo bo‘lmoqda. Ayni paytda barcha diqqat Stivenson va Perri o‘rtasidagi duelga qaratilgan. Bu bellashuvda kim g‘olib chiqsa, u irlandiyalik yulduzga qarshi maydonga chiqishi kutilmoqda.
Eslatib o‘tish kerak, Konor Makgregor oxirgi bor 2021 yildagi “UFC 264” turnirida oktagonga ko‘tarilgan edi. O‘sha jangda u amerikalik raqibi Dastin Porega qarshi maydonga tushib, birinchi raunddayoq texnik nokaut orqali mag‘lubiyatga uchragandi.
O‘sha kundan buyon Konor katta sport sahnasidan biroz uzoqlashdi va muxlislar uning qaytishiga intizor bo‘lib qolishdi. Endi esa u yangi ligada kuch sinashishga tayyorgarlik ko‘rmoqda.
Muxlislar uchun asosiy savol — irlandiyalik yulduzning bu qaytishi unga katta g‘alabalar yo‘lini ochib beradimi yoki yirik sinovlar oldida yanada og‘ir vaziyatlarni keltirib chiqaradimi?
