Angliya Premer-ligasida yozgi transferlar bozori qizg‘in pallaga kirgan bir paytda, «Nyukasl Yunayted»ning shved hujumchisi Aleksandr Isak atrofidagi xabarlar yanada qiziqish uyg‘otmoqda.
Klub rahbariyati o‘z to‘purarini sotish bo‘yicha qat’iy qarorga kelgan va uning yangi manzili sifatida «Liverpul» asosiy da’vogar sifatida ko‘rilmoqda. Manbalarga ko‘ra, «Nyukasl» Isak uchun 150 million yevro miqdorida narx belgilagan. Agar mersisaydliklar bu summaga rozilik bildirsa, yirik transfer yozda amalga oshishi mumkin.
Ma’lum qilinishicha, ikki klub o‘rtasida yangi kelishuv yuzasidan muzokaralar boshlanishi arafasida. Shu bilan birga, «Nyukasl» avvalroq «Liverpul»ning 120 million yevrolik taklifini rad etgani eslatib o‘tildi.
Shu tariqa, Premer-liga tarixidagi eng yirik va shov-shuvli transferlardan biri amalga oshishi mumkin. Muxlislar esa Isakning keyingi qadamlarini katta qiziqish bilan kuzatmoqda.
