O‘zbekiston Respublikasi Prezidenti Shavkat Mirziyoyev Amerika Qo‘shma Shtatlari Prezidenti Donald Tramp bilan telefon orqali muloqot qildi. Suhbat davomida ikki davlat o‘rtasidagi strategik sheriklik munosabatlarini yanada rivojlantirish, turli sohalarda o‘zaro manfaatli hamkorlikni kengaytirish va amaliy yo‘nalishlarda qadamlar qo‘yish masalalari atroflicha muhokama qilindi.
Muzokara chog‘ida alohida e’tiborga molik jihat sifatida futbol mavzusi ham tilga olindi. Qayd etilishicha, O‘zbekiston milliy jamoasi ilk bor jahon chempionatiga yo‘llanma olgani munosabati bilan ham suhbatda fikr almashilgan.
Prezident Shavkat Mirziyoyev jamoamiz kelasi yili AQSH, Kanada va Meksikada o‘tadigan mundialda ishtirok etishini mamnuniyat bilan ta’kidladi. Donald Tramp esa, o‘z navbatida, O‘zbekiston terma jamoasiga chin qalbdan omad tilab, milliy jamoamizning yangi tarixiy sahifa ochganini alohida qayd etdi.
Telefon orqali muloqot ikki davlat rahbarlari o‘rtasidagi samimiy munosabatlar va ochiq mulohazalar ifodasi sifatida o‘tdi. Muloqotda nafaqat siyosiy va iqtisodiy yo‘nalishlardagi masalalar, balki xalqlar o‘rtasidagi madaniy hamkorlik va sport orqali yaqinlashuv mavzulari ham o‘rin oldi.
Shu tariqa, Prezidentlar suhbati nafaqat davlatlararo munosabatlarni mustahkamlash, balki O‘zbekiston milliy terma jamoasining jahon futboli sahnasidagi yangi tarixiy qadamini ham quvonch bilan baham ko‘rdi.
“Zamin”ni Telegramʻda oʻqing!
