Angliyaning Liverpul shahrida o‘tayotgan kattalar o‘rtasidagi jahon chempionati tobora qizg‘in bosqichga kirdi. Bugungi kun davomida jami yetti nafar bokschimiz turli vazn toifalarida maydonga tushishi belgilangan edi.
Biroq -65 kg vazn toifasidagi yarim final jangidan kutilmagan xabar keldi. Gruziya terma jamoasi vakili Lasha Guruli jarohat sababli ringga chiqish imkoniyatiga ega bo‘lmadi. Shu bois, mazkur bellashuv bekor qilindi va Asadxo‘ja Mo‘ydinxo‘jayev avtomatik ravishda finalga yo‘llanma oldi.
O‘zbekiston boks federatsiyasi tarqatgan rasmiy ma’lumotga ko‘ra, endi hal qiluvchi bahsda Asadxo‘ja braziliyalik tajribali sportchi Yuri Reisga qarshi to‘qnash keladi. Muxlislar uchun bu jang albatta katta qiziqish uyg‘otishi shubhasiz. Chunki Asadxo‘ja shu paytga qadar namoyish etgan ishonchli harakatlari bilan nafaqat murabbiylar, balki xalqaro ekspertlarning ham e’tiborini qozondi.
Eslatib o‘tamiz, bizni oldinda yana bir hamyurtimiz Javohir Ummataliyev ham muhim bahsda maydonga tushishi kutilmoqda. Uning raqibi – xorvatiyalik mashhur bokschi Gabriel Veochich.
Shu tariqa, Liverpuldagi jahon chempionatida o‘zbek bokschilari final yo‘llanmalari uchun olib borayotgan kurash har kun sari kuchayib bormoqda. Bu yirik musobaqadagi har bir g‘alaba nafaqat sportchilarimiz uchun, balki butun mamlakat sport jamoatchiligi uchun ham katta sharaf hisoblanadi.
“Zamin”ni Telegramʻda oʻqing!
