Angliyaning Liverpul shahrida qizg‘in tus olgan kattalar o‘rtasidagi jahon chempionati o‘z avj pallasiga yetdi. Turnir doirasidagi hal qiluvchi bahslar yurtdoshlarimizning irodasi va mahoratlarini yanada yaqqol namoyon qilmoqda.
-65 kg vazn toifasida hamyurtimiz Asadxo‘ja Mo‘ydinxo‘jayev ringga ko‘tarilib, braziliyalik Yuri Reis bilan bellashdi. Qat’iyat va keskinlikka to‘la bo‘lgan jangovar to‘qnashuvning ilk raundida Asadxo‘ja ochkolar bo‘yicha raqibidan ortda qoldi. Biroq u ruhan sinmadi, aksincha keyingi ikki raundda o‘zini qo‘lga olib, ustunlikni qo‘lga kiritdi.
Mo‘ydinxo‘jayevning matonati va tajribasi hal qiluvchi omilga aylandi. U har bir zarbasini o‘ylanib berdi, himoyada ham ishonchli harakat qildi va natijada hakamlar uning g‘alabasini e’tirof etdi. Shu tariqa, Asadxo‘ja jahon chempioni unvoniga sazovor bo‘ldi.
Ushbu natija nafaqat sportchining shaxsiy yutug‘i, balki butun yurtimiz boksi uchun ham ulkan sharaf hisoblanadi. Yurtdoshimizning ringdagi irodasi, mehnat va sabri uni oliy martabaga olib chiqdi.
Eslatib o‘tamiz, chempionatda yana bir bokschimiz — Javohir Ummataliyev ham finalda fransuz sportchisi Yojerlen Sezarga qarshi kuch sinashadi. Muxlislar uning ham omadini tilab, katta umid bilan bahsni kutmoqda.
“Zamin”ni Telegramʻda oʻqing!
