Yaqin vaqtlarda Yevropa qit’asining eng nufuzli klub turniri – Chempionlar ligasining umumiy bosqich o‘yinlari start oladi. Bu yilgi formatga ko‘ra, jami 36 ta elita jamoa ishtirok etadi va ularning har biri sakkiztadan bahs o‘tkazishi kerak bo‘ladi.
Jamoalarning taqvimiga ko‘ra, ular uy maydonida ham, safarda ham to‘rttadan o‘yinda maydonga tushishadi. Bu bosqichda eng yaxshi sakkizlikka kirgan klublar to‘g‘ridan to‘g‘ri nimchorak finalga yo‘l oladi. Shu bilan birga, 9–24-o‘rinlarni egallagan jamoalar qo‘shimcha pley-off bosqichida kuch sinashishadi. Ushbu davrada har bir jamoa ikki o‘yin orqali keyingi bosqich yo‘llanmasi uchun harakat qiladi.
Joriy mavsumda bosh sovrin uchun da’vogarlar orasida Ispaniya chempioni “Barselona” alohida tilga olinmoqda. Kataloniya klubi yetakchisi Lamin Yamal esa o‘z fikrlarini bayon etib, eng asosiy raqobatchilarni sanab o‘tdi.
— Chempionlar ligasida biz uchun asosiy raqiblar kimlar? Birinchi navbatda, “Manchester Siti”, “Liverpul”, “Real Madrid”, “Bavariya” va “Pari Sen-Jermen” deb ayta olaman. Bu klublar yillar davomida chempionlik uchun asosiy nomzodlardan biri bo‘lib kelgan, — dedi yosh iste’dod.
Shu bilan birga, o‘zbekistonlik muxlislar uchun yana bir muhim yangilik — 21 yoshli himoyachi Abduqodir Husanov yangi mavsumda Yevropa Chempionlar ligasida ishtirok etadigan yagona o‘zbek futbolchisi sifatida qayd etildi. U oxirgi ikki mavsum davomida “Lans” va “Manchester Siti” tarkibida musobaqada maydonga tushdi. Ayniqsa, o‘tgan yil “Santyago Bernabeu”da “Real”ga qarshi bahsda Vinisius Juniorga qarshi o‘yini mutaxassislardan yuqori baho olgan edi.
Endilikda savol shunday: yangi mavsumda Husanov qaysi yulduzlarga qarshi o‘ynaydi? Agar taqdir taqvimida “Manchester Siti” “Barselona”ga duch kelsa, o‘zbek himoyachisi jahon futbolida shiddat bilan ko‘tarilayotgan Lamin Yamalni to‘xtata oladimi?
Chempionlar ligasi start olish arafasida nafaqat Yevropada, balki O‘zbekistonda ham katta qiziqish bilan kutilmoqda. Muxlislar esa o‘zbek futbolchisining yangi tarixiy sinovlariga guvoh bo‘lishga hozir.
“Zamin”ni Telegramʻda oʻqing!
