"Manchester Siti" "Napoli"ni ishonchli hisobda mag‘lub qildi, Husanov to‘liq o‘ynadi

Chempionlar ligasi guruh bosqichining dastlabki turida "Manchester Siti" o‘z maydonida "Napoli"ni qabul qilib, 2:0 hisobida g‘alaba qozondi.

Birinchi bo‘limda inglizlarning mutlaq ustunligiga qaramay, hisob ochilmadi. Ammo ikkinchi bo‘limda Gvardiola shogirdlari raqib darvozasini ishg‘ol etishdi: 56-daqiqada Erling Xoland, 65-daqiqada Jeremi Dok-u o‘z hisobiga gol yozdirib qo‘ydi.

Asosiy vaziyat 21-daqiqada bo‘ldi - "Napoli" sardori Jovanni Di Lorenso to‘g‘ridan to‘g‘ri qizil kartochka olib, jamoasini kamchilikda qoldirdi.

Statistikaga ko‘ra, "Siti" darvoza tomon 23 ta zarba yo‘llagan, shundan 8 tasi aniq, to‘pga 74% egalik qilgan va 805 ta aniq pas bergan. "Napoli" bunga birgina aniq zarba bilan javob qaytardi.