37 yoshli amerikalik mashhur bokschi Terens Krouford yana tarix yaratdi. 14-sentyabr kuni Las-Vegasdagi katta jangdan so‘ng u uchinchi marta mutlaq jahon chempioni unvonini qo‘lga kiritdi va o‘zining professional rekordini yanada mustahkamladi.
Kroufordning hozirgi statistikasi juda ta’sirli ko‘rinadi — 42 g‘alaba, shundan 31 tasi nokaut bilan va haligacha birorta ham mag‘lubiyat yo‘q. Bu ko‘rsatkich nafaqat uning bebaho mahoratidan dalolat bermoqda, balki uni zamonamizdagi eng kuchli bokschi sifatida ham namoyon qilmoqda.
Mazkur g‘alabadan keyin nufuzli ESPN sport portali Terens Kroufordni vazn toifalaridan qat’i nazar bokschilar reytingining birinchi o‘rniga qo‘ydi. Bunday yuksak natija Kroufordning qanchalik nufuzli sportchi ekanini yana bir bor isbotladi.
Yangi reyting quyidagicha shakllandi:
1. Terens Krouford (42-0, 31 KO)
2. Oleksandr Usik (24-0, 15 KO)
3. Naoya Inoue (31-0, 27 KO)
4. Dmitriy Bivol (24-1, 12 KO)
5. Jessi Rodriges (22-0, 15 KO)
6. Artur Beterbiyev (21-1, 20 KO)
7. Shukur Stivenson (24-0, 11 KO)
8. David Benavidez (30-0, 24 KO)
9. Dzunto Nakatani (31-0, 24 KO)
10. Saul Kanelo Alvares (63-3-2, 39 KO).
Eslatib o‘tamiz, 14-sentyabrga o‘tar kechasi Las-Vegasdagi “Allegiant Stadium” arenasida o‘tgan yirik jangda Krouford ringda Saul “Kanelo” Alvaresga qarshi to‘qnashdi. Qizg‘in kechgan bellashuvda 12 raund davomida har ikki sportchi jonbozlik ko‘rsatdi. Ammo hakamlarning yakdil qarori bilan g‘alaba Krouford tomoniga berildi (116-112, 115-113 va 115-113).
Bu natija orqali amerikalik sportchi nafaqat yangi unvon sohibi bo‘ldi, balki Kanelo kabi mashhur va tajribali raqibni yengib, o‘zining qay darajada kuchli bokschi ekanini namoyish qildi. Jangdan so‘ng ekspertlar ham, muxlislar ham Kroufordning muvaffaqiyati haqida ijobiy fikr bildirishdi.
Shu tariqa, Terens Krouford hozirda zamonaviy boksning mutlaq yetakchisi sifatida e’tirof etilmoqda. Uning kelgusi rejalari ham juda qiziq — sportchi yanada katta janglarga tayyorgarlik ko‘rmoqda.
“Zamin”ni Telegramʻda oʻqing!
