Yevropa Chempionlar ligasining amaldagi g‘olibi hisoblangan “Pari Sen-Jermen” qit’aning eng nufuzli klublar musobaqasi yangi mavsumida muhim bosqich oldidan jiddiy qiyin ahvolga tushib qoldi.
Fransiya chempionatining oxirgi turida “Oser”ga qarshi kechgan bahs parijliklar uchun o‘yin natijasidan ko‘ra futbolchilar salomatligi jihatidan og‘irroq bo‘ldi. Ushbu to‘qnashuvda yarim himoyachi Vitinya hamda hujumda yetakchi rol o‘ynab kelayotgan Xvicha Kvaratsxeliya turli xil jarohatlar olib, maydonni muddatidan ilgari tark etishga majbur bo‘ldi.
Bu hali muammolarning barchasi emas. Chunki 1-oktyabr kuni “Pari Sen-Jermen” Yevropa Chempionlar ligasi guruh bosqichi doirasida Kataloniyada “Barselona” bilan kuch sinashishi kerak. Biroq bosh murabbiy Luis Enrike jamoasining bir qator muhim ijrochilaridan foydalana olmaydi.
Carrusel Deportivo nashri tarqatgan ma’lumotlarga ko‘ra, yaqinda “Oltin to‘p”ning yangi egasi bo‘lgan Usmon Dembele hamda jamoaning tajribali himoyachisi Markinos “Barselona”ga qarshi bahsda aslo maydonga tusha olmaydi. Shuningdek, Fabian Ruis hamda yosh iqtidor egasi Dezire Duening ham katta uchrashuvda jamoaga yordam berishi shubha ostida turibdi.
Shu tariqa, “Pari Sen-Jermen” Kataloniyadagi sinovli safarga jiddiy yo‘qotishlar bilan chiqishga majbur bo‘ladi. Bunday holat esa Luis Enrike uchun taktik rejalarni o‘zgartirish, tarkibdagi kamchiliklarni yopish va jamoaviy o‘yinni yanada kuchaytirish zaruratini tug‘diradi.
Ko‘plab ekspertlar va futbol muxlislari ushbu o‘yinni Yevropa Chempionlar ligasi guruh bosqichidagi eng qiziqarli va muhim bahslardan biri sifatida ko‘rishmoqda. Parijliklar esa qancha yo‘qotishlarga qaramay, o‘z obro‘sini saqlab qolish va yuqori marralar uchun kurashishdan orqaga chekinmasligi aniq.
“Zamin”ni Telegramʻda oʻqing!
