«Manchester Siti» klubi rahbariyati jamoa bosh murabbiyi Pep Gvardiolaning kelgusi taqdiri borasida jiddiy qarorga kelgani ma’lum bo‘ldi. Don Balon nashri tarqatgan xabarga ko‘ra, agar «shaharliklar» Chempionlar ligasida o‘z oldiga qo‘yilgan maqsadlarga erisha olmasa, ispaniyalik mutaxassis lavozimidan ozod etilishi mumkin.
Manbalar ta’kidlashicha, klub uchun minimal talab — chorak finalga qadar yetib borish. Agar jamoa ushbu bosqichga yo‘l ololmasa, Gvardiola bilan xayrlashish ehtimoli keskin oshadi. Bu qaror klubning yuqori ambitsiyalari va Yevropadagi yutuqlarga intilishi bilan bog‘liq.
Ayni paytda, «Manchester Siti» guruh bosqichida ikki turdan keyin 4 ochko jamg‘argan. Bu ko‘rsatkich hozircha xavotirli emas, ammo keyingi turlardagi natijalar hal qiluvchi ahamiyat kasb etadi. Chunki «shaharliklar»dan doimiy ravishda finalga chiqish va g‘alabalar kutilmoqda.
Eslatib o‘tamiz, Pep Gvardiolaning amaldagi shartnomasi 2027-yil yoziga qadar amal qiladi. Ammo futbol olamida natijalar asosiy mezon ekanini hisobga olsak, shartnoma muddati murabbiy taqdirini kafolatlay olmaydi.
Gvardiola 2016-yildan buyon «Siti»ni boshqarib kelmoqda va jamoa bilan ko‘plab sovrinlarni qo‘lga kiritgan. Biroq klubning asosiy maqsadi — Chempionlar ligasida ustunlik qilish bo‘lib qolmoqda. Agar ushbu frontda yana omadsizlik qayd etilsa, ehtimol, klub rahbariyati yangi yo‘nalish tanlashga majbur bo‘ladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
