O‘zbekiston milliy jamoasining yetakchi futbolchilaridan biri Otabek Shukurov rasman BAA klubi "Baniyas" safida faoliyat yuritadigan bo‘ldi. Bu haqda klub matbuot xizmati ma’lumot berdi.
Oxirgi haftalarda xavbekning nomi BAAning bir qator jamoalari bilan jiddiy tarzda bog‘lanib kelinayotgan edi. Muzokaralar yakunida esa Shukurov o‘z tanlovini "Baniyas" foydasiga qildi. Klub rahbariyati va murabbiylar shtabi futbolchining tajribasi va maydondagi universal harakatlariga ishonch bildirmoqda.
Ma’lumki, Otabek Shukurov so‘nggi mavsumda Saudiya Arabistonining "Al-Feyha" jamoasi sharafini himoya qilgan. U hozirda erkin agent maqomiga ega edi va bu omil yangi klub topish jarayonini tezlashtirdi.
"Baniyas" jamoasi tarkibida Shukurov yurtimiz futbolchilaridan Akmal Mozgovoy bilan birga maydonga tushishi kutilmoqda. Mazkur duet terma jamoa muxlislari uchun alohida qiziqish uyg‘otishi shubhasiz. Ular BAA chempionatida nafaqat o‘zlarini, balki o‘zbek futbolini ham munosib tarzda namoyish etish imkoniyatiga ega bo‘ladi.
Shukurovning yangi klubiga ko‘chib o‘tishi uning karerasidagi navbatdagi muhim bosqich sifatida baholanmoqda. O‘zining tajribasi va mehnatsevarligi bilan xavbek "Baniyas"ning markaziy figuralaridan biriga aylanishi mumkin.
“Zamin”ni Telegramʻda oʻqing!
